ఎల్బీనగర్, వెలుగు: రంగారెడ్డి జిల్లా నాదర్ గుల్ లోని డీపీఎస్ (ఢిల్లీ పబ్లిక్ స్కూల్)లో విద్యార్థిని(13)ని పీఈటీ ప్రేమ పేరుతో వేధింపులకు పాల్పడ్డాడు. దీంతో విద్యార్థిని పేరెంట్స్ పోలీసులకు ఫిర్యాదు చేయగా కేసు నమోదు చేశారు. పోలీసులు తెలిపిన వివరాల ప్రకారం.. జయప్రకాష్ అనే వ్యక్తి నాదర్గుల్లోని ఢిల్లీ పబ్లిక్ స్కూల్లో 6 నెలలుగా పీఈటీగా పని చేస్తున్నాడు. అతడు ఓ విద్యార్థినిని ప్రేమిస్తున్నానని వెంటపడేవాడు.
తన ఫోన్ నంబర్ ఆమెకు ఇచ్చి కాల్ చేయాలని, లేదంటే చనిపోతానని తీవ్ర బెదిరింపులకు పాల్పడుతున్నాడు. దీంతో కొద్దిరోజులుగా స్కూల్కు వెళ్లేందుకు విద్యార్థిని ఇష్టపడం లేదు. పేరెంట్స్కు అనుమానం వచ్చి విద్యార్థినిని అడగడంతో అసలు విషయం చెప్పింది. దీంతో పేరెంట్స్ పోలీసులకు ఫిర్యాదు చేశారు. జయప్రకాశ్ను అరెస్ట్ చేసి పోక్సో యాక్ట్ కింద కేసు నమోదు చేసి రిమాండ్ కు తరలించారు. పేరున్న కార్పొరేట్ స్కూల్లో ఇలాంటి ఘటన జరగడంతో పేరెంట్స్ ఆందోళనకు గురవుతున్నారు.
