నలుగురిని అరెస్ట్ చేసిన పోలీసులు
చండీగఢ్: స్వాతంత్ర్య సంబురాలకు ముందు పంజాబ్లో టెర్రరిస్టుల పన్నాగాన్ని పోలీసులు తిప్పికొట్టారు. పాక్కు చెందిన ఐఎస్ టెర్రరిస్ట్ గ్రూప్ మద్దతుతో పంజాబ్లో పేలుళ్లకు ప్లాన్ చేస్తున్న నలుగురు టెర్రరిస్టులను అరెస్ట్ చేశారు. పంజాబ్, ఢిల్లీ పోలీసులు కలిసి చేపట్టిన ఈ ఆపరేషన్లో నిందితుల నుంచి 3 హ్యాండ్ గ్రనేడ్లు, ఒక ఐఈడీ, 2 పిస్టల్స్, 40 కాట్రిడ్జ్లను స్వాధీనం చేసుకున్నట్లు అధికారులు తెలిపారు. కెనడాకు చెందిన అర్ష్ డల్లా, ఆస్ట్రేలియాకు చెందిన గుర్జంత్ సింగ్తో ఈ నలుగురికి సంబంధాలున్నట్లు గుర్తించామన్నారు. కాగా, స్వాతంత్ర్య దినోత్సవాన్ని పురస్కరించుకుని చండీగఢ్లో పోలీసులు కట్టుదిట్టమైన భద్రతా ఏర్పాట్లు చేశారు.
యూపీలో జైషే యాక్టివిస్ట్ అరెస్ట్
టెర్రరిస్ట్ గ్రూప్ జైషే మహ్మద్(జేఈఎం)తో సంబంధాలున్న 19 ఏండ్ల హబీబుల్ ఇస్లాం అలియాస్ సైఫుల్లాను అరెస్ట్ చేసినట్లు ఉత్తరప్రదేశ్ పోలీసులు ఆదివారం తెలిపారు. నుపూర్శర్మపై ఆత్మాహుతి దాడికి ప్లాన్ చేసిన జేఈఎం టెర్రరిస్ట్ మహ్మద్ నదీమ్(25) తెలిపిన వివరాల ప్రకారం ఫతేపూర్ జిల్లాలో ఉంటున్న సైఫుల్లాను యాంటీ టెర్రరిస్ట్ స్క్వాడ్ బృందం అరెస్ట్ చేసిందని డీజీపీ నవీన్ అరోరా వెల్లడించారు. నదీమ్ తనకు తెలుసునని, వాళ్లిద్దరికీ జేఈఎంతో సంబంధాలున్నట్లు సైఫుల్లా ఒప్పుకున్నాడని పేర్కొన్నారు. బీహార్కు చెందిన సైఫుల్లా సీక్రెట్ ఐడీలను తయారు చేయడంలో దిట్ట అని, నదీమ్తో పాటు పాకిస్తాన్, అఫ్గానిస్తాన్కు చెందిన 50 మంది టెర్రరిస్టులకు ఐడీలు అందజేశాడని చెప్పారు. అతడు జీహాదీ ట్రైనింగ్ను మన దేశంలో నిర్వహించాలని జేఈఎంను కోరినట్లు ఆధారాలున్నాయని డీజీపీ అరోరా చెప్పారు.
