ఆర్టీసీ బస్సులకు యాక్సిడెంట్లు
సంగారెడ్డి జిల్లాలో ఆటోలను ఢీకొన్న బస్సులు
సదాశివనగర్లో ఇద్దరు మృతి
సంగారెడ్డి జిల్లాలో
ఆటోలను ఢీకొన్న బస్సులు
సదాశివనగర్లో ఇద్దరు మృతి
16 మందికి తీవ్రంగా గాయాలు
మిన్పూర్లో ఒకరు మృతి
ఇంకొన్ని ప్రాంతాల్లో ప్రమాదాలు..
పదుల సంఖ్యలో క్షతగాత్రులు
సంగారెడ్డిటౌన్/పుల్కల్, వెలుగు నెట్వర్క్: ఆర్టీసీ బస్సులు ఆటోలను ఢీకొన్న ప్రమాదాల్లో సోమవారం ముగ్గురు ప్రాణాలు పోగొట్టుకున్నారు. 20 మంది వరకు తీవ్రంగా గాయాలపాలయ్యారు. అనుభవం లేని తాత్కాలిక డ్రైవర్లతో బస్సులు నడిపించడం వల్లే ఈ ప్రమాదాలు జరిగాయని ప్రయాణికులు మండిపడుతున్నారు. సంగారెడ్డి జిల్లా కొండాపూర్ మండలం గొల్లపల్లిలో ఓ బంధువు చనిపోవడంతో అంత్యక్రియలకు వెళ్లొస్తున్న వారి ట్రాలీ ఆటోను ఎదురుగా వస్తున్న హైదరాబాద్–2 డిపోకు చెందిన ఆర్టీసీ బస్సు బలంగా ఢీకొట్టింది. ట్రాలీలో ఉన్న 18 మందిలో సంగారెడ్డి జిల్లా పుల్కల్ మండలం చౌటకూర్కు చెందిన అత్తాకోడళ్లు బాగమ్మ(55), చంద్రకళ(35) అక్కడిక్కడే మృతి చెందారు. మరో 16 మంది గాయపడ్డారు. వారిలో ముగ్గురి పరిస్థితి విషమంగా ఉన్నట్టు వైద్యులు తెలిపారు.
ఆటో ట్రాలీలో ఉన్నవారంతా చౌటకూర్ గ్రామానికి చెందినవారే. సంగారెడ్డికి సమీపంలోని ఎంఎన్ఆర్ చౌరస్తా సదాశివనగర్ వద్ద సోమవారం సాయంత్రం ఈ ప్రమాదం జరిగింది. అందులో ఉన్నవారంతా ఎగిరి చెల్లాచెదురుగా రోడ్డుపై పడిపోయారు. గాయపడ్డవారిని సంగారెడ్డి గవర్నమెంట్ హాస్పిటల్కు తరలించి వైద్యం అందిస్తున్నారు. తమ గ్రామానికి చెందిన ఇద్దరు చనిపోవడం, 16 మంది గాయపడటంతో చౌటకూర్లో విషాదం నెలకొంది. కాగా బస్సులో ఉన్న 35 మంది ప్రయాణికులకు ఎలాంటి గాయాలు కాలేదు. టెంపరరీ డ్రైవర్కు మాత్రం స్వల్పంగా గాయాలయ్యాయి.
మిన్పూర్లో మరో ప్రమాదం
సంగారెడ్డి–-సింగూర్‌ రహదారిపై మిన్పూర్ సమీపంలోఆర్టీసీ బస్సు ఎదురుగా వస్తున్న ఓ ఆటోను ఢీకొట్టింది. సోమవారం రాత్రి జరిగిన ఈ ప్రమాదంలో పుల్కల్ మండలం కోడూర్కు చెందిన పెద్దబాగు యాదయ్య (38) అక్కడికక్కడే మృతి చెందాడు. మరొకరు గాయపడ్డారు. బస్సు డ్రైవర్ అతివేగం, అజాగ్రత్త వల్లనే ఈ ప్రమాదం జరిగిందని స్థానికులు చెప్తున్నారు.
తాగి బస్సు నడిపిన డ్రైవర్పై దాడి
హైదరాబాద్–2 డిపోకు చెందిన బస్సు నిజామాబాద్ జిల్లా పిట్లంకు వెళ్తుండగా.. అదే రూట్లో ముందు వెళ్తున్న ఏపీలోని కాకినాడ డిపోకు చెందిన సూపర్ లగ్జరీ బస్సును వెనుక నుంచి ఢీకొట్టింది. కూకట్పల్లి వై జంక్షన్ వద్ద జరిగిన ఈ ప్రమాదంలో కొందరికి స్వల్పంగా గాయాలయ్యాయి. దీనిపై ప్రయాణికులు తీవ్ర ఆందోళన వ్యక్తం చేశారు. టెంపరరీ డ్రైవర్ మద్యం తాగిన మత్తులో ఉండటంతో ప్రమాదం జరిగిందంటూ మండిపడ్డారు. డ్రైవర్ను చితకబాది పోలీసులకు అప్పగించారు. ఈ సమయంలో మూసాపేట నుంచి కూకట్పల్లి వైజంక్షన్ వరకు ట్రాఫిక్ నిలిచిపోయింది.
కండక్టర్ను ఢీకొట్టిన బస్సు..
కరీంనగర్ బస్టాండ్‌లో సమ్మెలో ఉన్న శంకరయ్య అనే కండక్టర్ ను బస్సు ఢీకొట్టడంతో స్వల్ప గాయాలయ్యాయి. దీంతో కార్మికులంతా ఆగ్రహించి, ఆ బస్సు నడిపిన తాత్కాలిక డ్రైవర్ ను అరెస్టు చేయాలని ధర్నాకు దిగారు. పోలీసులు కండక్టర్ను ఆస్పత్రికి తరలించారు, డ్రైవర్ను అదుపులోకి తీసుకున్నారు.
కాలుపైకి బస్ ఎక్కించిండు
నల్లగొండ జిల్లా హాలియా బస్టాండ్‌లో ఓ ప్రయాణికుడి కాలుపైకి డ్రైవర్ బస్సు ఎక్కించాడు. నల్గొండ టౌన్ చైతన్యపురి కాలనీకి చెందిన చంద్రకాంత్.. బస్సు దిగుతుండగా డ్రైవర్ ముందుకు పోనించాడు. దీంతో చంద్రకాంత్ కిందపడ్డాడు. బస్సు వెనుక చక్రాలు అతని కాలుపై నుంచి వెళ్లాయి. ఈ ప్రమాదంలో అతని కాలికి తీవ్ర గాయాలయ్యాయి. వెంటనే అతన్ని స్థానిక ఆస్పత్రి తరలించారు.
