ఖమ్మం/ఖమ్మం టౌన్, వెలుగు: ఖమ్మం జిల్లా కేంద్రాన్ని ఆనుకొని ఉన్న విలువైన భూమిలో కొందరు గుడిసెలు వేసేందుకు ప్రయత్నించడం శనివారం ఉద్రిక్తతకు దారితీసింది. ఖమ్మం అర్బన్ మండలం వెలుగుమట్ల రెవెన్యూ పరిధిలోని సర్వే నంబర్ 147, 148 ,149 లో 62.7 ఎకరాల భూమి ఉంది. తమకు 2014లో భూదాన్ బోర్డు 100 గజాల చొప్పున ఇచ్చిన పట్టాలున్నాయంటూ గత వారం రోజులుగా నిరుపేదల సంఘం కమిటీకి చెందిన కొందరు వ్యక్తులు అక్కడ రేకులతో ఇండ్లు నిర్మించేందుకు ఏర్పాట్లు చేసుకుంటున్నారు. ఈ విషయం తెలిసి శనివారం ఉదయం పెద్ద సంఖ్యలో పోలీసులతో కలిసి రెవెన్యూ అధికారులు అక్కడికి చేరుకొని అడ్డుకున్నారు. జిల్లా కలెక్టర్ వీపీ గౌతమ్, పోలీస్ కమిషనర్ విష్ణు వారియర్ కూడా అక్కడికి చేరుకొని వారితో మాట్లాడారు. వారి దగ్గర ఉన్న భూదాన్ బోర్డు పట్టా పేపర్లను పరిశీలించారు. రెవెన్యూ పట్టాలుంటే చూపించాలని కోరగా.. లేవని వారు సమాధానమిచ్చారు. భూదాన్ బోర్డు ఇచ్చిన పట్టాలపై హైకోర్టులో ప్రస్తుతం విచారణ జరుగుతున్నదని, ప్రభుత్వం తరపున రెవెన్యూ డిపార్ట్ మెంట్ కూడా కౌంటర్ దాఖలు చేసిందని ఆఫీసర్లు వివరించారు. కోర్టు తీర్పు వచ్చే వరకు ఎవరూ భూమిని ఆక్రమించుకునే ప్రయత్నం చేయొద్దని చెప్పి జేసీబీలు, డోజర్లతో తాత్కాలిక నిర్మాణాలను పోలీసులు తొలగించారు. ఈ సమయంలో జేసీబీలను అడ్డుపడేందుకు కొందరు మహిళలు ప్రయత్నించగా, మహిళా పోలీసులు అక్కడి నుంచి వారిని బలవంతంగా పక్కకి తీసుకెళ్లారు.
