ముషీరాబాద్, వెలుగు : జీపీ కార్మికులకు కనీస వేతనంతో పాటు వారి న్యాయమైన సమస్యలు పరిష్కరించాలని తెలంగాణ గ్రామ పంచాయతీ ఎంప్లాయిస్ అండ్ వర్కర్స్ యూనియన్ డిమాండ్ చేసింది. లేకపోతే సమ్మెకు దిగుతామని హెచ్చరించింది. గత ప్రభుత్వాలు కూడా సమస్యలు పరిష్కరించకుండా మోసం చేశాయని, ఇప్పుడున్న కేంద్ర, రాష్ట్ర ప్రభుత్వాలు కూడా అదేవిధంగా వ్యవహరిస్తున్నాయని మండిపడింది. గ్రామ పంచాయతీ సిబ్బంది వేతనాలు పెంచాలని, పెండింగ్ జీతాలు రిలీజ్ చేయాలని, మల్టీపర్పస్ విధానం రద్దు చేయాలనే తదితర డిమాండ్లతో సీఐటీయూ ఆధ్వర్యంలో 12వ తేదీన మొదలైన 350 కి.మీ పాదయాత్ర మంగళవారంతో ముగిసింది. ఈ సందర్భంగా ఇందిరా పార్క్ వద్ద బహిరంగ సభ ఏర్పాటు చేశారు. ఈ సందర్భంగా సుందరయ్య విజ్ఞాన కేంద్రం నుంచి ఇందిరా పార్క్ దాకా ర్యాలీ నిర్వహించారు. సభకు చీఫ్ గెస్ట్గా హాజరైన సీఐటీయూ జాతీయ కోశాధికారి సాయిబాబా మాట్లాడారు. జీపీ కార్మికులను విస్మరించిన పాలకులకు ఏ విధంగా బుద్ధి చెప్పారో.. అదేవిధంగా రాబోయే రోజుల్లో గుణపాఠం చెప్పాలని పిలుపునిచ్చారు. కార్మికుల సమస్యలపై బీజేపీ స్టేట్ చీఫ్ బండి సంజయ్ స్పందించాలని డిమాండ్ చేశారు.
కార్మికులతో వెట్టి చాకిరీ చేయిస్తున్నది..
కార్మికులకు నామమాత్రంగా వేతనాలు ఇస్తూ ప్రభుత్వం వెట్టి చాకిరీ చేయిస్తున్నదని సీఐటీయూ రాష్ట్ర ప్రధాన కార్యదర్శి పాలడుగు భాస్కర్ విమర్శించారు. కార్మికులను పర్మినెంట్ చేసి.. వేతనాలు పెంచాలని డిమాండ్ చేశారు. న్యాయపరమైన సమస్యలు పరిష్కరించకపోతే ఉద్యమాన్ని తీవ్రతరం చేస్తామని హెచ్చరించారు. కార్మికులు పోరాడి సాధించుకున్న 29 కార్మిక చట్టాలను కేంద్ర ప్రభుత్వం రద్దు చేసి నాలుగు లేబర్ కోడ్లు తీసుకొచ్చిందని సీఐటీయూ రాష్ట్ర అధ్యక్షుడు చుక్క రాములు అన్నారు. ఈ కోడ్తో జీపీ కార్మికులకు, సిబ్బందికి కార్మిక చట్టాలు వర్తించకుండా కుట్రలు పన్నిందని ఆరోపించారు. బహిరంగ సభలో యూనియన్ గౌరవ అధ్యక్షులు గ్యార పాండు, వెంకటయ్య, గణపతి రెడ్డి, తునికి మహేశ్, జీపీ కార్మికులు తదితరులు పాల్గొన్నారు.
