విశ్వ హిందూ మహాసభ ఉత్తరప్రదేశ్ యూనిట్ చీఫ్ రంజిత్ బచ్చన్(40) దారుణహత్యకు గురయ్యారు. మార్నింగ్ వాక్ చేసే సమయంలో ఓ దుం డగుడు రంజిత్ పై కాల్పులు జరపడంతో ఆయన అక్కడికక్కడే చనిపోయారు. ఆదివారం ఉదయం లక్నోలోని హజ్ రత్ గంజ్ ఏరియాలో ఈ ఘోరం జరిగింది. ఈ ఘటనలో రంజిత్ సోదరుడు ఆదిత్య శ్రీవాస్తవ గాయపడినట్టు లక్నో జాయింట్ కమిషనర్ ఆఫ్ పోలీస్ నవీన్ అరోరా చెప్పారు. రంజిత్, ఆదిత్య మొబైల్ ఫోన్లను దుండగుడు అపహరించారన్నారు. మార్నింగ్ వాక్ కోసం ఓసీఆర్ బిల్డింగ్ నుంచి బయటకు వచ్చిన తమను గ్లోబ్ పార్క్ దగ్గర శాలువా కప్పుకున్న ఓ వ్యక్తి ఆపాడని, తమ నుంచి ఫోన్లు లాక్కుని.. ఆ తర్వాత కాల్పులు జరిపాడని ఆదిత్య చెప్పినట్టు అరోరా వెల్లడించారు. గోరఖ్ పూర్ కు చెందిన రంజిత్ ..చాలా కాలం సమాజ్ వాదీ పార్టీతో కలిసి పనిచేశారు. 2002–09 వరకు ఆ పార్టీ తరఫున సైకిల్ ర్యాలీలు చేశారు. ఈ కేస్ ను సాల్వ్ చేసేందుకు క్రైం బ్రాంచ్ కు చెందిన ఎనిమిది టీమ్లను రంగంలోకి దించామని ఆరోరా చెప్పారు. కాల్పులు జరిపిన వ్యక్తిని గుర్తించేందుకు ఘటన జరిగిన ప్రాంతంలోని సీసీ టీవీఫుటేజ్ ను కూడా పరిశీలిస్తున్నామన్నారు. ఈ ఘటనకు సంబంధించి విధుల్లో నిర్లక్ష్యం వహించిన ఒక ఎస్ఐ సహా నలుగురు పోలీసులను ప్రభుత్వం సస్పెండ్ చేసింది.
