కొండ కోనలూ.. వాటిపై మంచు తెరలు.. మధ్య మధ్యలో లోయలు.. నీటి గలగలలు.. వీటన్నింటి మధ్య చేసే సాహసాలు. ఇవన్నీ సరదాకి అయితే ఓకే .. కానీ స్టార్టప్గా అంటే? ఆ ఆటల్ని మించిన అడ్వెంచర్. అయినా అడ్వెంచర్ చేయాల్సిందే అనుకున్నారు ఈ అన్నదమ్ములు. నలుగురూ వెళ్లేదారిలో కాకుండా తమకోసం కొత్త దారి వేసుకోవాలని ‘క్లిఫ్ ఇన్ అడ్వెంచర్స్’ అనే స్టార్టప్ని మొదలుపెట్టారు. సాహసించకపోతే జీవితంలో ఏదో కోల్పోయినట్టే అంటున్న వీళ్ల పేర్లు రవి తేజ,
సాయి తేజ. ఈ హైదరాబాదీల సక్సెస్ స్టోరీ వాళ్ల మాటల్లోనే...
‘‘ట్రావెలింగ్ అంటే...ప్రకృతి, పచ్చదనాల్లో హాయిగా ఊపిరి పీల్చుకోవడం. కానీ అడ్వెంచర్ ట్రావెలింగ్ అలా కాదు..దీనిలో ప్రతి అడుగు ఓ సవాలు విసురుతుంది. దాన్ని దాటే ధైర్యాన్నీ నింపుతుంది. దారులన్నీ మూసుకుపోయినా బతకడం ఎలాగో నేర్పిస్తుంది. జీవితానికి బోలెడు అనుభవాల్ని, ఆనందాల్ని ఇస్తుంది. అందుకే స్టార్టప్ కోసం సాహసాల్నే ఎంచుకున్నాం. ధైర్యాన్నే పెట్టుబడిగా పెట్టాం. మన దగ్గర పెద్దగా ఆదరణ లేని వాటర్, రాక్ రాఫ్టింగ్, రాక్ క్లైంబింగ్, క్యాంప్ఫైర్స్, హైక్స్, సర్వైవల్ క్యాంప్స్ లాంటి అడ్వెంచర్ స్పోర్ట్స్పై అవేర్నెస్ కల్పిస్తున్నాం. అయితే ఈ స్టార్టప్కి తొలి అడుగు మా చిన్నప్పుడే పడిందంటున్నాడు రవి తేజ.
అట్రాక్ట్ చేశాయి
చిన్నప్పుడు సెలవులొస్తే ఆంధ్రప్రదేశ్లోని సీలేరులో ఉన్న అమ్మమ్మ ఇంటికి వెళ్లేవాళ్లం. అక్కడ జలపాతాలు, సెలయేళ్లు, ఎత్తైన గుట్టలపై ఉండే గుడి.. చాలా అట్రాక్ట్ చేశాయి మమ్మల్ని. అది మొదలు... ట్రావెలింగ్ అంటే ఎక్కడ లేని ఉత్సాహంతో పరుగులు తీసేవాళ్లం. అలా మొదలైన మా ట్రావెలింగ్కి ఊపిరి పోసింది మాత్రం స్కూల్ ఎన్.సి.సి (నేషనల్ క్యాడెట్ కార్డ్స్). ఈ క్యాంప్స్లో భాగంగా డిఫరెంట్ ప్లేస్లకి వెళ్లేవాళ్లం. అడ్వెంచర్ స్పోర్ట్స్ కూడా ఆడేవాళ్లం. దాంతో అడ్వెంచర్ ట్రావెలింగ్పై మరింత ఇంట్రెస్ట్ వచ్చింది. కానీ, ఆ సాహసాలన్నింటికీ ఇంటర్మీడియెట్ చదువు బ్రేక్ వేసింది. మళ్లీ డిగ్రీలో ఎన్.సి.సి లో చేరాం. నేషనల్ లెవల్స్ క్యాంప్స్ చేశాం. అలా ఓసారి క్యాంప్ కోసం నార్త్కి వెళ్లినప్పుడు అడ్వెంచర్ స్పోర్ట్స్ యాక్టివిటీలో పార్టిసిపేట్ చేశాం. కానీ, మేము తప్పించి.. మిగతా వాళ్లంతా ఈజీగా ట్రెక్కింగ్ చేశారు. అప్పుడనిపించింది నార్త్ వాళ్లకున్నంత ట్రెక్కింగ్ నాలెడ్జ్ మనకి లేదని. ఈ యునిక్ స్పోర్ట్ని నేర్చుకోవాలన్న ఆసక్తి కూడా అక్కడే మొదలైంది.
జాయిన్ అయ్యా..
ట్రెక్కింగ్ గురించి పూర్తిగా తెలుసుకోవాలని బలంగా ఉంది. కానీ, ఎలా అన్నదే మా ముందున్న ప్రశ్న. దాని కోసం తెలిసిన వాళ్లందర్నీ అడిగాం. చివరికి ‘తెలంగాణ మౌంటెనీరింగ్ క్లబ్’లో ఫ్రీగా ట్రెక్కింగ్ నేర్పిస్తారన్న విషయం తెలిసి అక్కడికి వెళ్లాం. వాళ్లు పెట్టిన టెస్ట్లన్నీ పాస్ అవడంతో మాకు కిరణ్ కుమార్, రాజేందర్ ఆరు నెలల పాటు ట్రనింగ్ ఇచ్చారు. అది పూర్తయ్యాక ఆ క్లబ్లోనే ఫ్రీలాన్సర్స్గా పనిచేశాం. వాళ్లు కండక్ట్ చేస్తున్న ట్రెక్కింగ్, హైకింగ్ ఈవెంట్స్లో పార్టిసిపేట్ చేయబోయే గ్రూప్స్కి ట్రైనింగ్ ఇచ్చాం. వాళ్లతో కలిసి కేదార్కాంత, హర్ కి దున్, బాలి పాస్, సందక్పు మౌంటెన్స్పై ట్రెక్కింగ్ చేశాం. వాటి వల్ల అడ్వెంచర్ స్పోర్ట్స్పై మరింత ఆసక్తి పెరిగింది. దాంతో మా ప్యాషన్నే ప్రొఫెషన్గా మార్చుకోవాలని 2016లో డిసైడ్ అయ్యాం.
జీతమే..పెట్టుబడి
నాన్న క్యాబ్ నడిపేవారు. ఆయన సంపాదనతో మా కాలేజీ ఫీజులు, ఇంటి ఖర్చులు వెళ్లదీయడమే కష్టమయ్యేది. అలాంటి పరిస్థితుల్లో నాన్నపై మా స్టార్టప్ భారాన్ని మోపడం కరెక్ట్ అనిపించలేదు. అందుకే పెట్టుబడి కోసం ఉద్యోగంలో చేరా. ఆ సంపాదనతోనే మౌంటెనీరింగ్‌‌‌‌లో సర్టిఫికేషన్ చేశా. మా తమ్ముడు సాయి చరణ్ని బేసిక్ మౌంటెనీరింగ్ కోర్సులో జాయిన్ చేశా. స్టార్టప్కి కావాల్సిన గేర్స్ కూడా కొన్నా. చిట్టీలు కట్టి ఒక లక్ష రూపాయలు పోగు చేశా. ముందుగా టెస్టింగ్ లెవల్స్లో స్కూల్, కాలేజీల్లో అడ్వెంచర్ స్పోర్ట్స్పై అవేర్నెస్ కల్పించాం. ఆ తర్వాత ఉద్యోగం మానేసి చేతిలో ఉన్న ఆ కొద్ది డబ్బుతోనే 2019 లో ‘క్లిఫ్ ఇన్ అడ్వెంచర్స్’ ని మొదలుపెట్టాం.
ఇందులో ‘క్లిఫ్’.. మౌంటెయిన్ని, ‘ఇన్’.. స్టే, ఫుడ్ని, ‘అడ్వెంచర్’.. అడ్వెంచర్ గేమ్స్ని రిప్రజెంట్ చేస్తుంది. అయితే మొదట్లో అన్ని స్టార్టప్స్లాగానే మా స్టార్టప్కు చాలా సమస్యలు ఎదురయ్యాయి. ఆఫీసుకి స్పేస్ తీసుకునేంత స్తోమత లేదు. అలాగే మార్కెటింగ్కి చేతిలో డబ్బు లేదు. అయినా నిరుత్సాహ పడలేదు. సోషల్ మీడియా, మా ఫ్రెండ్ సర్కిల్ ద్వారా కంపెనీని ప్రమోట్ చేసుకున్నాం. తర్వాత మా ఆలోచన నచ్చి ఇన్వెస్టర్ వెతుక్కుంటూ వచ్చారు. కొందరు పార్ట్నర్స్ కూడా తోడయ్యారు.
ఇతర రాష్ట్రాల్లోనూ..
ప్రతి నెలా 4 ఈవెంట్స్ కండక్ట్ చేస్తాం. అందులో ఒకటి స్కూల్ పిల్లలు, ఎన్సిసి స్టూడెంట్స్ కోసం ఫ్రీగా చేస్తాం. మిగతా మూడింటిలో ప్రతి ట్రిప్కి 20 నుంచి 25మంది ట్రావెలర్స్ ఉంటారు. ప్రతి పదిమందికి ఒక గైడ్ని ఇస్తాం. ట్రావెలింగ్ అయితే ఎక్కువగా గోకర్ణ , దండేలి, హంపి, ఊటి, మనాలి, కొడైకెనాల్ లాంటి ప్లేస్లకి తీసుకెళ్తాం. ట్రెక్కింగ్ అయితే హిమాలయాల లాంటి మౌంటెన్ ఏరియాలకి తీసుకెళ్తుంటాం. వాళ్లు ఎంచుకున్న ట్రిప్ని బట్టి ముందుగానే రోప్ కోర్సు, రాక్ క్లైంబింగ్, బౌల్డరింగ్, ర్యాప్లింగ్, హైకింగ్ అండ్ ట్రెక్కింగ్లో ట్రైనింగ్ ఇస్తాం. వర్క్ షాప్స్ కూడా కండక్ట్ చేస్తాం.
తెలుగు రాష్ట్రాలతో పాటు ఉత్తరాఖండ్, లడక్, మహారాష్ట్ర, గుల్మార్గ్, బెంగళూరు, ఢిల్లీ, ఆగ్రాల్లో మాకు టీమ్స్ ఉన్నాయి. ట్రావెలర్ బస్సు ఎక్కిన దగ్గర్నించి.. వాళ్లు తిరిగి ఇంటికి చేరుకునే వరకు పూర్తి రెస్పాన్సిబిలిటీ మేమే తీసుకుంటాం.
అదే గోల్ ..
వింటర్ సీజన్లో ట్రావెల్ ట్రిప్స్ ఎక్కువ. వర్షాకాలంలో హైకింగ్ ట్రిప్స్, సమ్మర్లో స్నో ట్రెక్కింగ్స్ ఉంటాయి. ఎండాకాలం పిల్లల కోసం క్యాంప్స్ కూడా ఏర్పాటు చేస్తాం. మా ట్రావెలర్స్లో 20 నుంచి 35 యేండ్ల లోపు వాళ్లే ఎక్కువ. ‘క్లిఫ్ ఇన్ అడ్వెంచర్స్’ని ట్రావెల్, ట్రెక్కింగ్కి ది బెస్ట్ ఛాయిస్గా చేయాలన్నదే మా గోల్. అలాగే అడ్వెంచర్ స్పోర్ట్స్ని అందరి లైఫ్లో భాగం చేయాలనుకుంటున్నాం. ముఖ్యంగా స్కూల్, కాలేజీల్లో వీటి గురించి అవేర్నెస్ కల్పించాలి అనుకుంటున్నాం” అని వాళ్ల అడ్వెంచర్ స్టార్టప్ జర్నీ గురించి చెప్పారు రవి, సాయి.
::: ఆవుల యమున
