దండేపల్లి, వెలుగు: మంచిర్యాల జిల్లా దండేపల్లి మండలం గూడెం గ్రామంలో దారుణం జరిగింది. కూతురును ప్రేమించాడన్న కోపంతో మేనల్లుడిని అతని మామ కత్తితో బెదిరించి గడ్డిమందు కలిపిన బీర్ను తాగించాడు. బాధిత యువకుడు చికిత్స పొందుతూ మృతి చెందగా, పోలీసులు నిందితుడిని మంగళవారం రాత్రి అరెస్ట్ చేశారు. లక్సెట్టిపేట సీఐ కృష్ణారెడ్డి తెలిపిన వివరాల ప్రకారం, గూడెం గ్రామానికి చెందిన దుడ్డంగుల అనిల్(22), అదే గ్రామానికి చెందిన తన మేనమామ దారంగుల రాజమౌళి కూతురు ప్రేమించుకున్నారు. ఇది తెలిసిన రాజమౌళి ఈ నెల 14 న మాట్లాడేది ఉంది రమ్మని చెప్పి అనిల్ను లక్షెట్టిపేట శివారులోని టేకుచెట్ల దగ్గరకు తీసుకెళ్లాడు. ముందుగా ఒక బీరు తాగించాడు. తర్వాత గడ్డిమందు కలిపిన బీరును ఇచ్చి తాగాలని కత్తితో బెదిరించాడు.
దీంతో అనిల్ ఆ బీర్ తాగి స్పృహ తప్పగానే రాజమౌళి అక్కడి నుంచి పరారయ్యాడు. స్పృహ కోల్పోయిన అనిల్ ఎట్టకేలకు తన ఇంటికి వెళ్లి కుటుంబసభ్యులకు విషయం చెప్పాడు. వెంటనే హాస్పిటల్కు తరలించగా చికిత్స పొందుతూ ఈ నెల 16న చనిపోయాడు. అనిల్ తండ్రి శంకర్ ఫిర్యాదు మేరకు కేసు దర్యాప్తు చేసి నిందితుడు రాజమౌళిని అరెస్టు చేసినట్టు సీఐ తెలిపారు.
