అమెజాన్ ఓనర్ కమ్ సీఈవో జెఫ్ బెజోస్ను మైక్రోసాఫ్ట్ అధిపతి బిల్ గేట్స్ దాటేశారు. మళ్లీ ప్రపంచ కుబేరుడిగా అవతరించారు. శుక్రవారం బ్లూమ్బర్గ్ విడుదల చేసిన తాజా ప్రపంచ కుబేరుల జాబితాలో బిల్గేట్స్ మొదటి స్థానాన్ని దక్కించుకున్నారు. దాదాపు రెండేళ్ల తర్వాత మళ్లీ ఆయన ఫస్ట్ ప్లేస్లోకి వచ్చారు. క్లౌడ్ కంప్యూటింగ్ కాంట్రాక్ట్ను అమెజాన్కు కాకుండా మైక్రోసాఫ్ట్కు పెంటగాన్ అప్పగించడంతో సంస్థ ఆస్తులు పెరిగాయి. 1000 కోట్ల డాలర్ల (సుమారు ₹71,635 కోట్లు) విలువైన ప్రాజెక్ట్ను దక్కించుకోవడంతో మైక్రోసాఫ్ట్ ఆస్తులు 11000 కోట్ల డాలర్లకు (సుమారు 7.88 లక్షల కోట్ల రూపాయలు) చేరింది. ప్రాజెక్టు దక్కడంతో కంపెనీ షేర్ల విలువ కూడా 4 శాతం పెరిగింది. అన్నీ కలిసి మైక్రోసాఫ్ట్ అధిపతికి లక్ను తీసుకొచ్చాయి. ఇక, వస్తుందనుకున్న కాంట్రాక్ట్ వేరే కంపెనీకి పోవడంతో అమెజాన్ షేర్ల విలువ 2 శాతం పడిపోయింది. దీంతో బెజోస్ ఆస్తి 10,870 కోట్ల డాలర్లకు (సుమారు 7.78 లక్షల కోట్ల రూపాయలు) పడిపోయింది. యూరప్కు చెందిన కోటీశ్వరుడు బెర్నార్డ్ ఆర్నాల్ట్ 10270 కోట్ల డాలర్లతో (సుమారు 7.35 లక్షల కోట్ల రూపాయలు) మూడో స్థానంలో ఉన్నారు.
దెబ్బ కొట్టిన విడాకులు
బెజోస్ రెండో స్థానానికి పడిపోవడానికి భార్య మెకంజీతో విడాకులూ ప్రభావం చూపించాయి. విడాకుల తర్వాత భరణం కింద ఆమెకు బెజోస్ 3800 కోట్ల డాలర్లు (సుమారు 2.72 లక్షల కోట్ల రూపాయలు) చెల్లించారు. విడాకులు కాకపోయుంటే, బెజోసే ప్రపంచంలో అత్యంత సంపన్నుడిగా ఉండేవారు. కాబట్టి విడాకులే ఆయన ర్యాంకుపై దెబ్బ కొట్టిందన్నది నిజమని నిపుణులు అంటున్నారు. ఇక, ఈ జాబితాలో ముఖేశ్ అంబానీ 14 వ స్థానంలో నిలిచారు. 5670 కోట్ల డాలర్లతో (సుమారు 4.06 లక్షల కోట్ల రూపాయలు) ఆస్తి ఆయన వద్ద ఉంది. ప్రపంచ వ్యాప్తంగా మొత్తం 500 మందితో బ్లూమ్బర్గ్ ఈ జాబితా విడుదల చేసింది. మొత్తం 17 మంది ఇండియన్లు ఈ జాబితాలో చోటు సంపాదించారు.
