- త్వరలో కాంగ్రెస్లో చేరుతారని ప్రచారం
- ఎంపీ టికెట్ కోసం ప్రయత్నాలు!
హైదరాబాద్, వెలుగు: జీహెచ్ఎంసీ మాజీ మేయర్, బీఆర్ఎస్ సీనియర్ నేత బొంతు రామ్మోహన్.. సీఎం రేవంత్ రెడ్డితో భేటీ అయ్యారు. ఆదివారం రేవంత్ నివాసంలో జరిగిన ఈ సమావేశంలో ప్రభుత్వ సలహాదారు వేం నరేందర్రెడ్డి, ఎమ్మెల్యే రామచంద్రు నాయక్, జగదీశ్వర్ గౌడ్ పాల్గొన్నారు. బొంతు రామ్మోహన్ కాంగ్రెస్లో చేరుతారంటూ కొద్ది రోజులుగా ప్రచారం జరుగుతున్నది. ఈ క్రమంలో ఆయన సీఎంను కలవడంతో దానికి మరింత బలం చేకూరింది. రామ్మోహన్ కాంగ్రెస్లో చేరడం దాదాపు ఖాయమైపోయిందని.. ఆయన భార్య, చర్లపల్లి కార్పొరేటర్ బొంతు శ్రీదేవి కూడా చేరుతారని తెలుస్తున్నది.
వారం రోజుల్లో రామ్మోహన్ కాంగ్రెస్లో చేరుతారని.. రెండు మూడ్రోజుల్లో తేదీ నిర్ణయించి, ఏ రోజున చేరేది ప్రకటిస్తారని పార్టీ వర్గాలు పేర్కొంటున్నాయి. సికింద్రాబాద్ లేదా మల్కాజిగిరి ఎంపీ సీటు ఇవ్వాలని రామ్మోహన్ అడిగారని.. అయితే పార్టీలో చేరిన తర్వాత టికెట్పై నిర్ణయం తీసుకుంటామని సీఎం రేవంత్ చెప్పినట్టు సమాచారం. బీఆర్ఎస్ అధిష్టానం తీరుపై కొద్దిరోజులుగా రామ్మోహన్ అసంతృప్తితో ఉన్నారు. ఉద్యమ ద్రోహులుగా పేరున్న పలువురు సీనియర్ లీడర్లనే బీఆర్ఎస్అధిష్టానం వెనకేసుకొస్తున్నదని రామ్మోహన్ సన్నిహితుల వద్ద వాపోయినట్టు తెలుస్తున్నది. పార్టీ జెండా మోసిన వారిని పట్టించుకోవడం లేదని ఆవేదన వ్యక్తం చేసినట్టు తెలిసింది. కాగా, మూడ్రోజుల కిందనే మాజీ డిప్యూటీ మేయర్ బాబా ఫసీయుద్దీన్ కాంగ్రెస్ లో చేరారు.
