సికింద్రాబాద్, వెలుగు: అక్రమంగా రైలులో తరలిస్తున్న ఫారిన్ సిగరెట్లను ఆర్పీఎఫ్, సౌత్ సెంట్రల్ రైల్వే క్రైమ్ ఇంటెలిజెన్స్ పోలీసులు పట్టుకున్నారు. రైల్వే పోలీసులు తెలిపిన వివరాల ప్రకారం. ఈ నెల 3న నాంపల్లి రైల్వే స్టేషన్కు వచ్చిన తెలంగాణ ఎక్స్ ప్రెస్ నుంచి పెద్ద పెద్ద పార్సిళ్లను అన్లోడ్ చేయడాన్ని గమనించిన పోలీసులు అనుమానంతో వాటిని తనిఖీ చేశారు.
15 పార్సిళ్లు న్యూ ఢిల్లీ నుంచి వచ్చినట్లు గుర్తించారు. వాటిని తెరిచి చూడగా.. 45 కార్టెన్ బాక్సుల్లో 4 లక్షల 50 వేల ఫారిన్ బ్రాండ్ సిగరెట్లు కనిపించాయి. ఈ పార్సిళ్లన్నీ కిరాణా వస్తువుల పేరుతో ఢిల్లీ నుంచి హైదరాబాద్కు ఫేక్ నేమ్తో బుక్ చేసినట్లు పోలీసులు గుర్తించారు. పట్టుబడ్డ ఫారిన్ సిగరెట్ల విలువ సుమారు 67 లక్షలకుపైగా ఉండొచ్చన్నారు. పార్సిళ్లను బుక్ చేసిన వ్యక్తిపై రైల్వే యాక్ట్ కింద కేసు ఫైల్ చేసినట్లు తెలిపారు.
