- నామినేషన్ బేసిస్లో రూ.25 కోట్లకు ఎసరు
- స్టేట్వైడ్ 9 డీసీసీబీలు, 369 బ్రాంచిల్లో సాఫ్ట్వేర్ అప్డేట్ కాంట్రాక్టు
- రూ.3 కోట్లకు చేస్తామని వచ్చిన కంపెనీని రిజక్ట్ చేసిన ఆఫీసర్లు
- ఒక్కో ప్యాక్స్ పైన రూ.4.60 లక్షల ఆర్థిక భారం
- డీసీసీబీ పాలకమండళ్ల తీర్మానం లేకుండానే టెస్కాబ్ ఫైనల్
- ఆఫీసర్ల నిర్ణయాన్ని వ్యతిరేకిస్తున్న ఉద్యోగ సంఘాలు
నల్గొండ, వెలుగు : టెస్కాబ్ (తెలంగాణ స్టేట్ కోఆపరేటివ్ అపెక్స్ బ్యాంక్ లిమిటెడ్)లో సాఫ్ట్వేర్ కాంట్రాక్టు వ్యవహారం కలకలం సృష్టిస్తోంది. రాష్ట్రంలోని తొమ్మిది డీసీసీబీలు, 369 పీఏసీఎస్లలో సాఫ్ట్ వేర్ అప్డేట్చేసేందుకు ఆఫీసర్లు తీసుకున్న నిర్ణయాన్ని ఉద్యోగ సంఘాలు తీవ్రంగా వ్యతిరేకిస్తున్నాయి. నిబంధనలకు విరుద్ధంగా నామినేషన్ బేసిస్పై టెండరు కట్టబెట్టడమేగాక, రైతుల సొమ్ముతో నడుస్తున్న పీఏసీఎస్లపైన అనవసర ఆర్థిక భారం మోపేలా ఆఫీసర్లు తీసుకున్న నిర్ణయాన్ని తప్పుపడుతున్నారు. దీని పై న్యాయ పోరాటం చేసేందుకు డీసీసీబీ డైరక్టర్లు సిద్ధమయ్యారు.
జరిగిందీ ఇదీ..
రాష్ట్రంలో 9 డీసీసీబీలు, 369 పీఏసీఎస్లలో ఇప్పుడున్న సాఫ్ట్వేర్ స్థానం లో కొత్త సాఫ్ట్వేర్ అప్డేట్ చేయాలని టెస్కాబ్ ఆఫీసర్లు తీర్మానించారు. దీనికోసం ప్రత్యేకంగా ఒక సబ్ కమిటీని కూడా నియమించారు. ఈ కమిటీ లో టెస్కాబ్ చైర్మన్, వైస్చైర్మన్తో పాటు పలువురు ఉన్నతాధికారులు కూడా ఉన్నారు. ఈ కమిటీ నిర్ణయం మేరకు సాఫ్ట్వేర్ అప్డేట్ చేసేందుకు పక్కా ప్లాన్ చేశారు. ప్రస్తుతం సొసైటీ బ్యాంకుల్లో సింగిల్ బేస్ డేటా సిస్టమ్ (పీఏఎన్ఏసీఈఏ) పనిచేస్తోంది. దీని పైన డీసీసీబీలో, పీఏసీఎస్లలో ఆన్లైన్ బ్యాంకు లావేదేవీలు జరుగుతున్నాయి. 2013 నుంచి ఈ సాప్ట్ వేర్ పనిచేస్తోంది. ఉమ్మడి రాష్ట్రంలో 22 డీసీసీబీలో ఈ సాఫ్ట్వేర్ ఇన్స్టాల్ చేసేందుకు పెట్టిన ఖర్చు కేవలం రూ.4 కోట్లు మాత్రమే. కానీ ఇప్పుడు ఆసాఫ్ట్వేర్ అవుట్డేటెడ్ అయిందని చెప్పి దాని స్థానంలో కొత్త సాఫ్ట్వేర్ అప్డేట్చేయాలని ఆఫీసర్లు నిర్ణయించారు. బాంబేకు చెందిన ఓ కంపెనీకి సాఫ్ట్వేర్ రూపొందించే కాంట్రాక్టు అప్పగించారు. అయితే ఈ కంపెనీ కంటే ముందు రాష్ట్రానికి చెందిన మరొక కంపెనీ కూడా సాఫ్ట్వేర్ అప్డేట్ చేసేందుకు ముందుకు వచ్చింది. కాంట్రాక్టు కోసం ఈ రెండు కంపెనీలు పోటీ పడ్డాయి. రూ. 3 కోట్లకే సాఫ్ట్వేర్ అప్డేట్ చేస్తామని వచ్చిన సంస్థను కాదని బాంబేకి చెందిన వేరొక సంస్థకు రూ.25 కోట్లకు కాంట్రాక్టు ఇచ్చారు. విచిత్రమేమం టే 2010 వర్షన్ సాఫ్ట్వేర్ ఇన్స్టాల్చేస్తామని చెప్పిన సంస్థకు కాకుండా 2002 వర్షన్ సాఫ్ట్వేర్ ఇన్స్టాల్చేసే సంస్థకు కాంట్రాక్టు ఇవ్వడం అను మానాలకు తావిస్తోంది. పైగా ఎలాంటి టెండర్ లేకుండా నామినేషన్ బేసిస్పై కాంట్రాక్టు ఇవ్వడం అనే విషయం అంతుచిక్కడం లేదు. ఇప్పటికీ బాగానే పనిచేస్తున్న సాఫ్ట్వేర్ను అసలు మార్చాలని అవసరమే లేదని, అనవసరంగా బ్యాం కుల పై ఆర్థిక భారం మోపేలా ఆఫీసర్లు వ్యవహరిస్తు న్నారని ఉద్యోగ సంఘాలు మండిపడుతున్నాయి.
రూల్స్కు పాతర…
గవర్నమెంట్ రూల్స్ ప్రకారం రూ. 10 వేల అమౌంట్ దాటిన ఏ వర్క్ అయినా స్టేట్ లెవల్ టెక్నికల్ కమిటీ అప్రూవల్ ఉండాలి. కానీ అలాంటి నిబంధనలేవీ పాటించలేదని తెలుస్తోంది. డీసీసీబీలు, వాటి పరిధిలో పనిచే సే పీఏసీఎస్ లకు సంబంధించి ఎలాంటి నిర్ణయం తీసుకున్నా డీసీసీబీ పాలకమండళ్ల తీర్మానం తప్పనిసరి. కానీ సాఫ్ట్వేర్ కాంట్రాక్టు వ్యవహారం లో టెస్కాబ్ ఆఫీ సర్లే ఫైనల్ చేశారు. టెస్కాబ్ నిర్ణయాన్ని డీసీసీబీలకు పంపి ఆమోదం తీసుకున్నారని ఉద్యోగ సంఘాలు చెప్తున్నాయి. అదీగాక ఈ సాఫ్ట్వేర్ పనితీరు సరిగాలేదని కర్ణాటక వెళ్లొచ్చిన డీసీసీబీ ఆఫీసర్లు సైతం తేల్చారని యూనియన్ లీడర్లు చెబుతున్నారు. ఒకవేళ సాఫ్టవేర్ మార్చా లంటే ఆర్బీఐ, నాబార్డు రూల్స్ కచ్చితంగా పాటించాలని చెప్తున్నారు. ఆ ఫీసర్లు తీసుకుంటున్న చర్యల వల్ల బ్యాంకులు దివాళా తీసే పరిస్థితి వస్తద ని అంటున్నారు.
హైకోర్టులో పిల్ వేస్తాం
డీసీసీబీలు, పీఏసీఎస్లలో సాఫ్ట్వేర్ మార్చాలని టెస్కాబ్ తీసుకున్న ఏక పక్ష నిర్ణయాన్ని ఖండి స్తున్నాం. టెండరు లేకుండా నామినేషన్ బేసిస్పై రూ.25 కోట్లకు కాంట్రా క్టు ఇవ్వడం రూల్స్కు విరుద్ధం. దీనికి సంబంధించిన పే ఆర్డర్ కాపీ ఇవ్వాలని సమాచార హక్కు చట్టం కింద అడిగినా ఆఫీసర్లు నిరాకరించారు. దీంతో హైకోర్టులో పిల్ వేస్తున్నాం. ఆఫీసర్ల చర్యలను ఉద్యోగ సంఘాలు కూడా వ్యతిరేకిస్తున్నాయి. దీని పైన సమగ్ర విచారణ జరిపించాలని డిమాండ్ చేస్తున్నాం.
–కుంభం శ్రీనివాస్రెడ్డి, డీసీసీబీ డైరెక్టర్, నల్గొండ
