ఈస్టుకోస్టు రైల్వే అధికారులు ప్రయాణికుల సౌకర్యం కోసం రద్దీ ఎక్కువగా ఉన్న రూట్లలో మరో 20 ప్రత్యేక రైళ్లను నడపాలని నిర్ణయించారు. దేశంలోని ప్రధాన నగరాలకు ఈ రైళ్లను అందుబాటులోకి తీసుకొచ్చేందుకు చర్యలు చేపట్టారు. ఈస్టుకోస్టు రైల్వే పరిధిలోని వివిధ స్టేషన్ల నుంచి ఈ రైళ్లు ప్రారంభం కానున్నాయి. ఆన్ లైన్ రైల్వే టికెట్ బుకింగ్స్ లో జీరో లేదా 8 నంబరుతో ప్రత్యేక రైలు నంబర్లు ప్రారంభమవుతాయని తెలిపారు అధికారులు. ఈ రైళ్లు అందుబాటులోకి వస్తే ఐదు లక్షల మంది ప్రయాణికులకు అవసరమైన బెర్తులు లభిస్తాయి.
ముఖ్యంగా దేశరాజధాని ఢిల్లీ, సికింద్రాబాద్, బెంగళూరు, హౌరా, చెన్నై, అలహాబాద్, పాట్నా, భాగల్పూర్ నగరాలకు ఎక్కువ రద్దీ ఉంటుందని, ఈ రూట్లపై దృష్టిసారిస్తున్నట్లు అధికారులు తెలిపారు. దీంతోపాటు సాధారణ రైళ్లలోనూ బోగీల సంఖ్యను పెంచాలని నిర్ణయించామన్నారు. పండగల సందర్భంగా రాకపోకలు సాగించే ప్రయాణికులు, సాధారణ రైళ్లలో వెయిటింగ్ లిస్టు వస్తే ప్రత్యేక రైళ్లలో టికెట్లు తీసుకోవచ్చని సూచించారు.
