యాసంగి వడ్లకు టెండర్..మూడు లాట్లుగా మంచిర్యాల, నిర్మల్, సిరిసిల్ల వడ్లు

• ఒక్కోలాట్​లో 50 వేల మెట్రిక్ టన్నులు
•     మొత్తం లక్షన్నర టన్నులకు యాక్షన్ 
•     ఈనెల 28న బిడ్స్ ఓపెన్
•     కొన్న రేటుకే అమ్మడం ద్వారా భారీగా లాస్ 

మంచిర్యాల, వెలుగు: గత యాసంగి సీజన్​లో కొనుగోలు కేంద్రాల ద్వారా సేకరించిన దొడ్డు వడ్లను ఈ యాక్షన్​ ద్వారా అమ్మడానికి ప్రభుత్వం సిద్ధమైంది. రాష్ట్రవ్యాప్తంగా ఇంటర్​మీడియట్​ గోడౌన్లు, రైస్​ మిల్లుల్లో స్టాక్​ చేసిన వడ్లను విక్రయించేందుకు సివిల్ సప్లైస్​ డిపార్ట్​మెంట్​ఇటీవల టెండర్ నోటిఫికేషన్ జారీ చేసింది. ఇందులో మంచిర్యాల, నిర్మల్, రాజన్న సిరిసిల్ల జిల్లాల్లోని వడ్లను మూడు లాట్లు చేశారు. ఒక్కో లాట్​లో 50 వేల మెట్రిక్ టన్నుల చొప్పున మొత్తం లక్షన్నర టన్నులు విక్రయించనున్నారు. మంచిర్యాల జిల్లాలోని 26 గోడౌన్లు, నిర్మల్ జిల్లాలోని 30 గోడౌన్లలో ఉన్న స్టాక్​ను రెండు లాట్లు చేసి, మూడో లాట్​లో రాజన్న సిరిసిల్ల జిల్లాకు సంబంధించిన వడ్లను కూడా చేర్చారు. ఈనెల 28న బిడ్స్​ ఓపెన్ చేయనున్నారు. 

కొన్న రేటుకే అమ్మకం

రాష్ట్ర ప్రభుత్వం గ్రేడ్ ​-ఏ వడ్లు క్వింటాల్​కు రూ.2,389, గ్రేడ్​- బికి రూ.2,369 చెల్లించి కొనుగోలు చేయగా, అదే రేటుకు విక్రయిస్తోంది. టెండర్​లో క్వింటాల్​కు రూ.2,689 రిజర్వ్​ రేటు నిర్ణయించింది. అంతకంటే ఎక్కువ రేటు కోట్​చేసిన బిడ్డర్లకు వడ్లను అప్పగించనుంది. ప్యాడీ టెండర్​లో పెద్ద సంఖ్యలో మిల్లర్లు పాల్గొనే అవకాశం ఉన్నది. ఈ వడ్లను కొనుగోలు చేసి పెండింగ్​సీఎమ్మార్ ​క్లియర్​ చేయడానికి ముందుకొస్తారని ప్రభుత్వం భావిస్తోంది. కాగా, ఏజెన్సీ కమీషన్లు, బ్యాగుల కొనుగోళ్లు, హమాలీ, ట్రాన్స్​పోర్టేషన్​ చార్జీలు, గోడౌన్ల రెంట్, ఇతర ఖర్చులు​కలుపుకుంటే క్వింటాల్​కు రూ.3వేలు దాటుతుంది. కొన్న రేటుకే అమ్మడం వల్ల ప్రభుత్వానికి క్వింటాల్​కు రూ.500లకు పైగా లాస్​ వస్తుంది. 

భారం దించుకునేందుకే... 

రైతుల నుంచి సేకరించిన వడ్లను రాష్ట్రవ్యాప్తంగా ఇంటర్మీడియట్ గోడౌన్లు, రైస్ మిల్లుల్లో స్టోర్ చేశారు. ప్రభుత్వం పీడీఎస్​ కింద సన్నబియ్యం పంపిణీ చేస్తున్నందున దొడ్డు వడ్లను మిల్లింగ్​ చేసినా ఆ బియ్యాన్ని వినియోగించుకోలేని పరిస్థితి. మరోవైపు వానాకాలం సీజన్​లో సేకరించే వడ్లను దాచేందుకు గోడౌన్ల కొరత ఏర్పడింది. ఈక్రమంలో దొడ్డు వడ్లను వదిలించుకోవడం ద్వారా ప్రభుత్వానికి భారీగా ఇన్​కమ్​ రావడమే కాకుండా గోడౌన్లు ఖాళీ అవుతాయి. రెంట్​ భారం కూడా తప్పుతుంది. ఈ కారణంగానే లాస్ ​వచ్చినప్పటికీ వడ్లను అమ్మడానికే సిద్ధపడింది. గత యాసంగి సీజన్​లో మంచిర్యాల జిల్లాలో 1.80 లక్షల టన్నుల వడ్లను సేకరించారు. దాదాపు లక్ష మెట్రిక్ టన్నులను సీఎమ్మార్​కోసం మిల్లులకు కేటాయించగా, మిగిలిన వడ్లను గోడౌన్లలో స్టాక్​ చేశారు. ప్రస్తుతం జిల్లాలో 1,21,442 మెట్రిక్ టన్నుల ప్యాడీ నిల్వలు ఉన్నాయి.