శంషాబాద్, వెలుగు: కానిస్టేబుల్పై దాడి చేసి పారిపోయిన ఇద్దరు దొంగలను మైలార్ దేవ్ పల్లి పోలీసులు అరెస్ట్ చేశారు. పోలీసులు తెలిపిన వివరాల ప్రకారం.. ఫలక్నుమాకు చెందిన కరీం ఖాన్(20), మతిన్ ఖాన్(23) ఇద్దరు యువకులు గంజాయికి బానిసయ్యారు. ఈజీ మనీ కోసం ఒంటరిగా వెళ్లే వారిని కత్తులతో బెదిరించి డబ్బు, బంగారాన్ని దొంగిలించేవారు.
ఈ నెల 20న కరీం, మతిన్ ఇద్దరూ డమ్మీ గన్, 2 కత్తులు, రెడ్ చిల్లీ స్ప్రే బాటిళ్లను బ్యాగ్లో పెట్టుకొని రాత్రి 7 గంటలకు మైలార్ దేవ్ పల్లి నుంచి జల్ పల్లిలోని వాంబే కాలనీకి స్కూటీపై వచ్చారు. లక్ష్మీగూడలో గంజాయి అమ్ముతున్నారనే సమాచారంతో అప్పటికే ఆ ఏరియాలో శంషాబాద్ ఎక్సైజ్ పోలీసులు తనిఖీలు చేపట్టారు. బైక్ పై వస్తున్న వీరిని ఎక్సైజ్ కానిస్టేబుల్ లింగయ్య ఆపాడు. తనిఖీ చేస్తుండగానే.. ఇద్దరు దొంగలు రెడ్ చిల్లీ స్ర్పేను కానిస్టేబుల్ పై కొట్టి బైక్ను అక్కడే వదిలేసి పారిపోయారు.
ఈ ఘటనపై కేసు ఫైల్ చేసి దర్యాప్తు చేపట్టిన మైలార్దేవ్ పల్లి పోలీసులు ఇద్దరు దొంగల కోసం గాలింపు చర్యలు చేపట్టారు. గురువారం కరీం, మతిన్ను అదుపులోకి తీసుకున్నారు. వారి నుంచి బైక్ తో పాటు డమ్మీ గన్, రెండు కత్తులు, రెడ్ చిల్లీ స్ప్రే బాటిల్స్ ను స్వాధీనం చేసుకున్నారు. నిందితులను రిమాండ్ కు తరలించారు.
