భరతనాట్యం, కూచిపూడి, పాప్, హిప్హప్, ర్యాప్.... ఇలా డాన్స్లో చాలా రకాలున్నాయి. వీటిలో టట్ డాన్స్ కూడా ఒకటి. చేతివేళ్లని లయబద్ధంగా కదిలిస్తూ చేసే టట్ డాన్స్లో రాణిస్తోంది ఈ అమ్మాయి. పేరు నిధి అచ్చా. ముంబైలోని కుర్లాలో ఉండే ఈమె ఈమధ్యే జియోమెట్రిక్ లేడీస్ టట్ 2 డాన్స్ పొటీలో విజేతగా నిలిచింది. విశేషం ఏంటంటే... ఈ పోటీల్లో మనదేశం తరపున పార్టిసిపేట్ చేసిన ఏకైక అమ్మాయి నిధి.
టట్టింగ్ అనేది ఒకరకమైన స్ట్రీట్ డాన్స్. ఇది పాప్ డాన్స్ నుంచి పుట్టింది. టట్ డాన్సర్లు జియోమెట్రిక్ ఆకారంలో చేతులు, చేతి వేళ్లని తొంభై డిగ్రీలు కదిలిస్తారు. నిధి కూడా ఈ కొత్తరకం డాన్స్ నేర్చుకోవాలనుకుంది. ‘టట్ డాన్స్ నేర్చుకుంటా’నని చెప్పి అమ్మానాన్నని ఒప్పించింది. కూతుర్ని డాన్సింగ్ క్లాస్లో చేర్పించింది వాళ్ల అమ్మ. డాన్స్ ప్రోగ్రామ్స్, షూటింగ్ రాత్రిపూట ఉంటే నిధిని ఇంటికి తీసుకెళ్లేందుకు వాళ్ల నాన్న వెళ్లేవాడు. తల్లిదండ్రుల ఎంకరేజ్మెంట్ నిధిలో కాన్ఫిడెన్స్ పెంచింది. ఈమధ్య జరిగిన జియోమెట్రిక్ లేడిస్2 టట్ డాన్స్ పోటీల్లో నిధిని విజేతగా నిలిచేలా చేసింది. ఈ పోటీల్లో అమెరికా, చైనా, రష్యా, ఇంగ్లండ్, ఆసియా దేశాలకు చెందిన డాన్సర్లు పాల్గొన్నారు.
ఆడవాళ్లు లేకపోవడానికి...
‘‘ఫైనల్లో రెండు రౌండ్స్ జరిగాయి. చివరి రౌండ్ పోటాపోటీగా జరగడంతో గెలుస్తానని అసలు ఊహించలేదు. టట్ డాన్స్ చేసే ఆడవాళ్లు చాలా తక్కువ. డాన్స్ అనేది మగవాళ్లకు సంబంధించినది అనుకోవడమే అందుకు ప్రధాన కారణం. కొన్నిసార్లు డాన్స్ ప్రోగ్రామ్ ముగిసే సరికి రాత్రి అవుతుంది. దాంతో ఇష్టం ఉన్నా కూడా ఆడవాళ్లలో చాలమంది డాన్స్ని కెరీర్గా తీసుకోవడం లేదు. అయితే... ఇప్పడిప్పుడే ఆ పరిస్థితి మారుతోంది. చాలామంది టట్ డాన్స్ నేర్చుకోవాలి అనుకుంటున్నారు. అలాంటివాళ్లకు ఈ డాన్స్ మెలకువలు చెప్పాలని ఉంది” అని చెప్పింది 23 ఏండ్ల నిధి.