ఎక్కడైనా యాక్సిడెంట్ జరిగితే ‘అయ్యో పాపం’ అంటారు కొందరు. వీడియోలు, సెల్ఫీలు తీసుకొని సోషల్ మీడియాలో పెడతారు ఇంకొందరు. ప్రమాదం గురించి తెలుసుకొని అంబులెన్స్కు ఫోన్ చేస్తారు మరికొందరు. కొన్నిసార్లు అంబులెన్స్ వచ్చేలోపే జరగాల్సిన నష్టం జరిగిపోతుంది. టైంకి అంబులెన్స్ అందుబాటులో లేక ప్రాణాలు కోల్పోతున్నారని బాధపడ్డాడు ఈ తాత. అందుకే తన ఆటోను అంబులెన్స్గా మార్చి, ఎంతోమందిని కాపాడుతున్నాడు.
ఆటోను అంబులెన్స్గా మార్చిన ఈ పెద్దాయన పేరు హర్జీందర్ సింగ్. వయసు డెభ్బై ఆరు. ఈయన నడిపే ఆటో అంబులెన్స్లో కాటన్, బ్యాండేజ్, ఆయింట్మెంట్, ట్యాబ్లెట్లతో పాటు వాటర్క్యాన్ ఉంటాయి. దెబ్బ తగిలితే ఫస్ట్ ఎయిడ్ చేస్తాడు. అవసరమైతే ఆటోలో ఆస్పత్రికి తీసుకెళ్లి ట్రీట్మెంట్ ఇప్పిస్తాడు. ఆర్థిక పరిస్థితిని తెలుసుకొని ఫ్రీగా మందులు కూడా ఇస్తాడు.
బెస్ట్ ఆటో డ్రైవర్
ఢిల్లీకి చెందిన హర్జీందర్సింగ్ నలభై ఏళ్లుగా ఆటో నడుపుతున్నాడు. కొంతమంది డ్రైవర్లు అడ్డదిడ్డంగా వెహికల్స్ను నడుపుతుంటారు. నిర్లక్ష్యంగా నడుపుతూ ఒక్కోసారి ట్రాఫిక్ జాంకు కారణమవుతారు. కానీ హర్జీందర్ సింగ్ డ్రైవింగ్ రూల్స్ పాటిస్తూ, చక్కగా డ్రైవింగ్ చేస్తాడు. నలభై ఏళ్ల సర్వీస్లో ఒక్కరోజు కూడా పోలీసులకు చలానా కట్టలేదు. పోలీస్ డిపార్ట్మెంట్ హర్జీందర్ అంకితభావాన్ని మెచ్చి ‘బెస్ట్ ఆటో డ్రైవర్’గా సెలెక్ట్ చేసి సర్టిఫికెట్ కూడా అందించింది.
ఆటో అంబులెన్స్
హర్జీందర్సింగ్ మొదట్లో రిక్షా నడిపాడు. ఆ తర్వాత ఆటోకు షిఫ్ట్ అయ్యాడు. యూనియన్ మెంబర్తోపాటు ట్రాఫిక్ వార్డెన్ కూడా. “ నా చిన్నప్పుడు ఢిల్లీలో వరదలు వచ్చాయి. ఎంతోమంది రోడ్డున పడ్డారు. నాలాంటివాళ్లు ఒక గ్రూపుగా ఏర్పడి సేవా కార్యక్రమాలు చేశాం. ‘సిక్కు కమ్యూనిటీ మెంబర్’గా నావంతు సాయం చేశా. అప్పుడే సమాజానికి ఏదైనా చేయాలనిపించింది. అలా వచ్చిన ఆలోచనే ఈ ఆటో అంబులెన్స్’’ అని చెప్పాడు పెద్దాయన.
ఆస్పత్రికి చేరుస్తూ..
దేశ రాజధాని అయిన ఢిల్లీలో రెగ్యులర్గా యాక్సిడెంట్స్ అవుతాయి. అంబులెన్స్కు ఫోన్ చేసినా సరైన టైంకు రావు. ట్రాఫిక్, ఇతర కారణాల వల్ల చాలామంది చనిపోతున్నారు. అందుకే ఫ్రీ అంబులెన్స్ సర్వీస్ మొదలుపెట్టా అంటాడు ‘‘నేను వెళ్లే దారిలో ఎవరికైనా యాక్సిడెంట్ అయితే దగ్గర్లో ఉన్న హాస్పిటల్కు తీసుకెళ్తా. దాంతో వెంటనే ట్రీట్మెంట్ అందుతుంది. ఆటో వెనకాల ‘ఫ్రీ అంబులెన్స్ సర్వీస్’ అని రాసి ఉంటుంది. ఒక్కోసారి గవర్నమెంట్ అంబులెన్స్కు బదులు నాకే ఫోన్ చేస్తారు. అక్కడికి వెళ్లి ఫస్ట్ ఎయిడ్ సర్వీస్ చేస్తా. ఇందుకోసం ట్రైనింగ్ కూడా తీసుకున్నా. నా సాయం చూసి ఢిల్లీవాళ్లు ‘సింగ్ తాత యూ ఆర్ గ్రేట్’ అని అంటారు. మానవ సేవే మాధవ సేవ అన్నారు పెద్దలు. అందుకే తోటి మనుషులకు సాయపడాలనుకున్న. ఇప్పటివరకు ఎంతమంది ప్రాణాలు కాపాడేనో నాకు గుర్తులేదు. చివరి శ్వాస వరకు ఇదే పనిచేస్త. ‘ఈ ఏజ్లో ఇలాంటివి అవసరమా’ అని ఇంట్లోవాళ్లు అంటుంటారు. కానీ ‘దీంట్లోనే నాకు ఆనందం’ ఉందని చెప్తా”అంటాడు హర్జీందర్.