లక్నో: రాష్ట్రంలో బీజేపీ చాప్టర్ క్లోజ్ కానుందని సమాజ్వాదీ పార్టీ చీఫ్, ఉత్తరప్రదేశ్ మాజీ సీఎం అఖిలేశ్ యాదవ్ అన్నారు. రాబోయే లోక్సభ ఎన్నికల్లో పోటీ చేసేందుకు ఆ పార్టీకి అభ్యర్థులే దొరకట్లేదన్నారు. ఓడిపోతామని తెలిసి పోటీ చేసేందుకు క్యాండిడేట్లు ముందుకురావట్లేదని చెప్పారు. 90% మంది ప్రజలు, దళితులు, మైనార్టీలు పీడీఏ(పిచ్డే, దళిత్, అల్పసంఖ్యాక్) బీజేపీని ఓడించేందుకు ఎదురుచూస్తున్నారని చెప్పారు.
ఈ విషయాలన్నీ ఓ సర్వేలో తేలాయని ఆదివారం మీడియాకు వెల్లడించారు. పీడీఏ తరఫున పోరాటం చేస్తున్నది సమాజ్వాదీ పార్టీనే అని అన్నారు. తప్పుడు వాగ్దానాల కారణంగా రైతులు బీజేపీపై తిరగబడతారన్నారు. ఉద్యోగాలపై ఆశలు పెట్టుకున్న యువత కూడా బీజేపీకి వ్యతిరేకంగా ఓటేస్తారన్నారు. మహిళా రెజ్లర్ల దుస్థితి, మణిపూర్ అల్లర్ల వంటి ఘటనలపై బీజేపీ విధానాలను చూసిన మహిళలెవరూ ఆ పార్టీకి ఓటేయరని చెప్పారు.
