పాలిచ్చే తల్లులకి కరోనా సోకితే ‘బిడ్డకి పాలు ఇవ్వడం ఎలా?’ అని టెన్షన్ పడుతుంటారు. అయితే, వీళ్లకి కరోనా సోకినప్పటికీ ఎలాంటి భయం లేకుండా బిడ్డకు పాలివ్వొచ్చు. అంతేకాదు ఆ పాలలో దాదాపు పది నెలలు యాంటీ బాడీలు తయారవుతూనే ఉంటాయి. ఈ యాంటీ బాడీలు పసికందుల ఊపిరితిత్తుల్లో, పేగుల్లో వాటి గోడలకు అతుక్కుని ఉండి వైరస్లు కానీ, బ్యాక్టీరియా కానీ శరీరంలోకి రాకుండా అడ్డుకుంటాయి అంటున్నారు రీసెర్చర్స్. కరోనా తీవ్రత ఎక్కువ ఉన్నవాళ్లకి ట్రీట్మెంట్లో తల్లి పాలలోని ఈ యాంటీబాడీలు పనికొస్తాయట కూడా. న్యూయార్క్లోని మౌంట్ సినాయ్ హాస్పిటల్లో డాక్టర్గా పనిచేస్తున్న రెబెక్కా పావెల్ తల్లి పాలలోని ఇమ్యునోగ్లోబిన్స్ మీద రీసెర్చ్ చేస్తుంటుంది. ఈ మధ్య ఆమె కరోనా నుంచి కోలుకున్న 75 మంది పాలిచ్చే తల్లుల శాంపిల్స్ని టెస్ట్ చేయగా.. వాటిలోని 88 శాంపిల్స్లో ఇమ్యునోగ్లోబిన్–ఎ యాంటీబాడీ ఉన్నాయి.
ఇమ్యూనిటీ పెంచుతుంది
తల్లి పాలలో ఇమ్యునోగ్లోబిన్– ఎ అనే యాంటీబాడీ ఉంటుంది. ఇది పిల్లలను వైరస్, బ్యాక్టీరియా ఇన్ఫెక్షన్ల నుంచి కాపాడుతుంది. ఇమ్యూనిటీని ఇస్తుంది అని చెప్పింది రెబెక్కా.
