- రేపు రాష్ట్ర కేబినెట్ మీటింగ్
- బడ్జెట్ సమావేశాలు, ఆరు గ్యారంటీలు,
- ఉద్యోగాల భర్తీపైనా చర్చించే చాన్స్
హైదరాబాద్, వెలుగు: రాష్ట్ర అసెంబ్లీ బడ్జెట్ సమావేశాలు ఈ నెల 8వ తేదీ నుంచి ప్రారంభమయ్యే అవకాశాలు ఉన్నాయి. బడ్జెట్ సమావేశాల నిర్వహణ, ఆరు గ్యారంటీల అమలు, ప్రభుత్వ ఉద్యోగాల భర్తీపై చర్చించేందుకు రాష్ట్ర మంత్రివర్గం ఆదివారం సమావేశం కానుంది. సాయంత్రం 5 గంటలకు సెక్రటేరియెట్లో సీఎం రేవంత్ అధ్యక్షతన ఈ భేటీ జరగనుంది. కేంద్రం ఈ నెల ఒకటో తేదీన మధ్యంతర బడ్జెట్ను ప్రవేశపెట్టింది. దీంతో దానికి అనుగుణంగా రాష్ట్ర బడ్జెట్పై ఎలా ముందుకు వెళ్లాలనే దానిపై కేబినెట్లో చర్చించనున్నారు. కేంద్ర మధ్యంతర బడ్జెట్లో రాష్ట్రానికి ఏమేమి వస్తాయనే దానిపై క్లారిటీ రాలేదు. దీంతో రాష్ట్రంలోనూ మధ్యంతర బడ్జెట్ను పెట్టాలని భావిస్తున్నట్లు సమాచారం. మధ్యంతర బడ్జెట్ పెడితే వారం, 10 రోజుల పాటు అసెంబ్లీ సమావేశాలు నిర్వహించే అవకాశం ఉన్నది. ఈ అసెంబ్లీ సమావేశాల్లోనే ప్రభుత్వం ఇరిగేషన్పై శ్వేతపత్రం రిలీజ్ చేయనుంది. దీనిపై కూడా కేబినెట్లో చర్చించనున్నారు.
ఇక ఆరు గ్యారంటీల అమలులో భాగంగా ఇప్పటికే రెండు గ్యారంటీలు అమల్లోకి వచ్చాయి. మరో రెండు గ్యారంటీలు అమలు చేయనున్నట్లు ప్రభుత్వం ప్రకటించింది. రూ.500కే గ్యాస్ సిలిండర్ తో పాటు 200ల యూనిట్లలోపు కరెంట్ వినియోగం ఉచితంగా అందించేవి అందులో ఉన్నాయి. ఈ రెండింటిపైనా కేబినేట్లో చర్చించి ఆమోదం తెలుపనున్నారు. ప్రధానంగా ఉద్యోగాల భర్తీకి సంబంధించి కూడా రాష్ట్ర కేబినేట్లో చర్చించనున్నట్లు తెలిసింది. గ్రూప్ 1 పోస్టుల సంఖ్య పెంచాలని ప్రభుత్వం నిర్ణయం తీసుకున్నది. ఇప్పటికే వివిధ డిపార్ట్మెంట్లలో ఖాళీలు ఏమున్నాయో మళ్లీ తాజాగా వివరాలు తెప్పించుకున్నది. దాని ప్రకారం 43 కొత్త గ్రూప్1 వెకెన్సీ పోస్టులను అధికారులు గుర్తించారు. మరికొన్నింటిని పెంచాలని కూడా రాష్ట్ర సర్కార్ భావిస్తున్నది. దీంతో రానున్న ఆరు నెలల కాలంలో ఎంతమంది రిటైర్ అవుతారో వారి వివరాలు కూడా తీసుకుని గ్రూప్ 1 రిక్రూట్మెంట్ చేపట్టనుంది. మరో 23 పోస్టులకు సంబంధించి కొంత డైలమా ఉన్నది. వీటితో పాటు ఇతర గ్రూప్స్ పరీక్షలు, ఫలితాల వెల్లడి, కోర్టుల్లో ఉన్న కేసులు, జాబ్ క్యాలెండర్ ఇతరత్రా వంటి వాటిపై కేబినేట్లో చర్చించి నిర్ణయం తీసుకోనున్నట్లు తెలిసింది.
