న్యూఢిల్లీ: మొన్నమొన్నటిదాకా వేరే దేశాల నుంచి వచ్చినోళ్ల ద్వారానే అంటుకున్న కరోనా కొత్త వేరియంట్ఒమిక్రాన్.. ఇప్పుడు జనాల మధ్యలోకి చొరబడిపోయింది. దేశంలో కమ్యూనిటీ స్ప్రెడ్ మొదలైపోయిందని మన దేశ కరోనా జీనోమిక్స్ కన్సార్టియం(ఇన్సాకాగ్) ప్రకటించింది. చాలా సిటీలు, మెట్రోల్లో దాని కేసులే ఎక్కువగా ఉన్నాయని వెల్లడించింది. ఆదివారం విడుదల చేసిన తాజా బులెటిన్లో ఈ వివరాలను వెల్లడించింది. జనవరి 10న తయారుచేసిన ఆ నివేదికను ఇప్పుడు విడుదల చేసింది. ప్రస్తుతం ఒమిక్రాన్ కేసులే ఎక్కువగా ఉన్నాయని, కాబట్టి ఎస్ జీన్ను బేస్ చేసుకుని చేసే టెస్టులతో(యాంటీ జెన్) లాభం ఉండదని చెప్పింది. దానివల్ల తప్పుడు నెగెటివ్లు వస్తాయని తెలిపింది. పీసీఆర్ టెస్టులే చేయాలని సూచించింది. తాజాగా బి.1.640.2 వేరియంట్ను గుర్తించారని, దానివల్ల ప్రస్తుతానికి ముప్పేమీలేదని, మన దేశంలో ఆ కేసులు నమోదు కాలేదని ఇన్సాకాగ్ పేర్కొంది. కేంద్ర ఆరోగ్య శాఖ, డిపార్ట్మెంట్ ఆఫ్ బయోటెక్నాలజీతో పాటు మరో 38 ప్రభుత్వ లేబొరేటరీలతో కరోనా వేరియంట్లపై ఏర్పాటు చేసిన గ్రూపే ఈ ఇన్సాకాగ్.
యాక్టివ్ కేసులు ఎక్కువైతున్నయ్
దేశంలో వరుసగా నాలుగోరోజూ 3 లక్షలకుపైగా కరోనా కేసులు నమోదయ్యాయి. శనివారం 3,33,533 మంది మహమ్మారి బారిన పడ్డారు. మొత్తం కేసుల సంఖ్య 3 కోట్ల 92 లక్షల 37 వేల 264కు పెరిగింది. కేసులతో పాటే యాక్టివ్ కేసులూ దేశంలో ఎక్కువైపోతున్నాయి. ఒక్కరోజులోనే యాక్టివ్ కేసులు 73,840 పెరిగాయి. పెరిగిన వాటితో కలుపుకుని ప్రస్తుతం దేశంలో 21,87,205 పాజిటివ్ కేసులున్నాయి. వీక్లీ పాజిటివిటీ రేటు కూడా భారీగా పెరుగుతోంది. పోయిన వారం 16.87 శాతంగా ఉన్న పాజిటివిటీ రేటు.. ఈ వారం 17.78 శాతంగా నమోదైంది. కరోనాతో మరో 525 మంది చనిపోగా మొత్తం మరణాలు 4,89,409కి పెరిగాయి. చనిపోయినోళ్లలో 70 శాతం మంది వేరే జబ్బులతో బాధపడిన వాళ్లే ఉన్నారు. ఇప్పటిదాకా 3 కోట్ల 65 లక్షల 60 వేల 560 మంది మహమ్మారి బారి నుంచి కోలుకున్నారు. మొత్తంగా 161.92 కోట్ల వ్యాక్సిన్ డోసులు వేశారు. కాగా, దేశంలో ప్రస్తుతం కరోనా సోకే రేటు (ఆర్ వాల్యూ– ఒకరి నుంచి ఎంత మందికి అంటుకుంటుందని చెప్పే విలువ) తగ్గిందని ఐఐటీ మద్రాస్ వెల్లడించింది. జనవరి 14 నుంచి 21 మధ్య కరోనా ఆర్ వాల్యూ 1.57గా నమోదైందని చెప్పింది. అదే అంతకుముందు వారం 2.2గా ఉందని తెలిపింది. అయితే, వచ్చే వారం ఆర్ వాల్యూ పీక్కు వెళ్లే అవకాశం ఉందని పేర్కొంది.
