హైదరాబాద్, వెలుగు: సీఎం రేవంత్ రెడ్డి, డిప్యూటీ సీఎం భట్టి విక్రమార్క, మంత్రి ఉత్తమ్ కుమార్ రెడ్డి గురువారం ఢిల్లీకి వెళ్లనున్నారు. సాయంత్రం జరగనున్న కాంగ్రెస్ ఎలక్షన్ కమిటీ (సీఈసీ) మీటింగ్ లో వారు పాల్గొననున్నారు. రాబోయే లోక్సభ ఎన్నికల్లో కాంగ్రెస్ అభ్యర్థుల ఎంపికపై ఏఐసీసీ అధ్యక్షుడు మల్లికార్జున ఖర్గే, కాంగ్రెస్ అగ్రనేతలు సోనియాగాంధీ, రాహుల్ గాంధీ, సీఈసీ మెంబర్లు ఈ మీటింగ్లో చర్చించనున్నారు. మీటింగ్ తరువాత గురువారం రాత్రి లేదా శుక్రవారం ఉదయం దేశ వ్యాప్తంగా 150 మందితో ఫస్ట్ లిస్ట్ ను ప్రకటించనున్నట్లు తెలుస్తోంది.
ఆ లిస్ట్లో తెలంగాణ నుంచి 9 లేదా 10 మంది పేర్లు ఉంటాయని పార్టీ నేతలు చెప్తున్నారు. ఈనెల 7న కాంగ్రెస్ ఎంపీ అభ్యర్థులను ప్రకటిస్తామని, సీట్ల వారీగా పేర్లను సీఈసీకి పంపినట్లు ఇటీవల సీఎం మీడియాకు తెలిపారు. ఇప్పటికే తెలంగాణ నుంచి పోటీ చేసే 9 మంది అభ్యర్థులను బీజేపీ ప్రకటించగా, 4 సీట్లకు బీఆర్ ఎస్ పార్టీ ప్రకటించింది. ఈ నేపథ్యంలో కాంగ్రెస్ నుంచి మహబూబ్ నగర్, జహీరాబాద్, పెద్దపల్లి, కరీంనగర్, నిజామాబాద్, సికింద్రాబాద్ తో పాటు పలు సీట్లకు అభ్యర్థులను ప్రకటించనున్నట్లు తెలుస్తోంది.
