- పర్మిషన్ లేదంటూ కూల్చిన మున్సిపల్ సిబ్బంది
- ఆందోళనకు దిగిన మాజీ మంత్రి ఎర్రబెల్లి, వినోద్కుమార్
- మధ్యాహ్నం విగ్రహప్రతిష్ఠాపనకు సిద్ధమైన బీఆర్ఎస్ నాయకులు
- అడ్డుకునేందుకు పోలీసుల ప్రయత్నం, ఉద్రిక్తత
వరంగల్/నర్సంపేట, వెలుగు : వరంగల్జిల్లా నర్సంపేటలో మాజీ ఎమ్మెల్యే పెద్ది సుదర్శన్రెడ్డి విగ్రహ ప్రతిష్టాపన సందర్భంగా సోమవారం ఉద్రిక్తత నెలకొంది. పట్టణ శివారు దండుగడ్డ ప్రాంతంలోని మెడికల్కాలేజీ ఎదుట పెద్ది విగ్రహ ఏర్పాటు కోసం గద్దె నిర్మించారు. అయితే విగ్రహ ఏర్పాటుకు పర్మిషన్ లేదంటూ మున్సిపల్ ఆఫీసర్లు ఆదివారం రాత్రి గద్దెను కూల్చివేశారు.
విషయం తెలుసుకున్న మాజీ మంత్రి ఎర్రబెల్లి దయాకర్ రావు, మాజీ ఎంపీ బోయినపల్లి వినోద్కుమార్ ఆధ్వర్యంలో బీఆర్ఎస్నాయకులు, కార్యకర్తలు సోమవారం గద్దెను పరిశీలించారు. అనంతరం నర్సంపేట పట్టణంలోని అంబేద్కర్ సెంటర్ వద్దకు చేరుకొని మెయిన్రోడ్డుపై బైఠాయించి ఆందోళనకు దిగారు. పోలీసులు వచ్చి అడ్డుకునే ప్రయత్నం చేశారు.
ఈ సందర్భంగా ఎర్రబెల్లి పోలీసులతో మాట్లాడుతూ.. తాము రెండు రోజుల టైం ఇస్తున్నామని, గద్దెను కూల్చివేసింది ఎవరో చెప్పాలని డిమాండ్ చేశారు. అనంతరం నల్లబెల్లిలో పెద్ది దశదిన కార్యక్రమానికి వెళ్లిపోయారు. మధ్యాహ్నం మూడు గంటల సమయంలో బీఆర్ ఎస్ నాయకులు పెద్దసంఖ్యలో కూల్చివేసిన గద్దె వద్దకు చేరుకున్నారు.
అప్పటికప్పుడు మేస్ర్తీలను పిలిపించి గద్దెను నిర్మించి, పెద్ది విగ్రహ ప్రతిష్ఠకు ప్రయత్నించారు. సమాచారం తెలుసుకున్న నర్సంపేట ఏసీపీ రవీందర్రెడ్డి, తహసీల్దార్ రవిచంద్రారెడ్డి ఘటన స్థలానికి చేరుకుని బీఆర్ఎస్ నాయకులతో చర్చించే ప్రయత్నం చేయగా వారు వినలేదు. ఈ క్రమంలోనే నాయకులను అరెస్ట్ చేసేందుకు పోలీసులు ప్రయత్నించగా బీఆర్ఎస్ కార్యకర్తలు అడ్డుకున్నారు. తీవ్ర ఉద్రిక్తతల మధ్యే పెద్ది విగ్రహాన్ని ఆవిష్కరించడంతో పోలీసులు, రెవెన్యూ ఆఫీసర్లు వెనుదిరిగారు.
