న్యూఢిల్లీ: కళియుగ దైవం శ్రీవెంకటేశ్వర స్వామి దర్శనం కోసం తిరుపతి వచ్చే విదేశీ భక్తులకు కేంద్ర ప్రభుత్వం గుడ్ న్యూస్ చెప్పింది. తిరుపతి విమానాశ్రయంలో ఈ-వీసా సేవలు అందుబాటులోకి తీసుకొస్తున్నట్లు ప్రకటించింది. ఇప్పటి వరకు విదేశీ భక్తులు తిరుపతి రావాలంటే చెన్నై లేదా బెంగళూర్, హైదరాబాద్ చేరుకొని అక్కడ ఈ -వీసా ప్రక్రియ పూర్తిచేసుకుని అటు నుంచి తిరుపతి చేరుకునేవారు.
అయితే, కేంద్ర ప్రభుత్వ తాజా నిర్ణయంతో తిరుపతి విమానాశ్రయంలోనే ఈ - వీసా సేవలు అందుబాటులోకి రానున్నాయి. దీంతో శ్రీవారి దర్శనం కోసం వచ్చే విదేశీ భక్తులు ఇకపై నేరుగా తిరుపతి విమానాశ్రయం చేరుకొని అక్కడే ఈ - వీసా ప్రక్రియ ముగించుకోవచ్చు. ప్రయాణానికి కనీసం పది రోజుల ముందే ప్రయాణికులు ఆన్లైన్లో ఈ - వీసా అందుకోవాలి.
కాగా, తిరుపతి విమానాశ్రయంలో అంతర్జాతీయ సర్వీసులు లేనప్పటికీ ముందస్తుగానే కేంద్ర పౌర విమానయాన శాఖ ఈ- వీసా కౌంటరు మంజూరు చేసింది. అలాగే, తిరుపతి ఎయిర్ పోర్టు నుంచి త్వరలోనే ఇంటర్నేషనల్ సర్వీస్లు కూడా ప్రారంభించే అవకాశం ఉంది. 2007లోనే తిరుపతి విమానాశ్రయానికి అంతర్జాతీయ హోదా కల్పిస్తూ కేంద్ర క్యాబినెట్ నిర్ణయం తీసుకోగా.. 2017లో నోటిఫికేషన్ విడుదల చేసిన విషయం తెలిసిందే.
