ఈ -కేవైసీ చేస్కోకపోతే గ్యాస్ బంద్.. ఏ క్షణమైనా నిలిపివేస్తామంటున్న కంపెనీలు

• రెండేండ్ల నుంచి చాన్స్​ఇచ్చినా నో రెస్పాన్స్​
• ఇప్పటివరకు చేసుకున్నది 70 శాతమే 
• ఏ క్షణమైనా నిలిపివేస్తామంటున్న కంపెనీలు

హైదరాబాద్ ​సిటీ, వెలుగు: అర్హులైన గ్యాస్ వినియోగదారులను గుర్తించడంతో పాటు అర్హత లేని వారిని తొలగించేందుకు చేపట్టిన ఈ కేవైసీకి ఆశించిన స్థాయిలో స్పందన రాకపోవడంతో కంపెనీలు త్వరలోనే నిలిపివేసేందుకు నిర్ణయించినట్టు తెలుస్తోంది. ఒకవేళ అదే జరిగితే ఈ కేవైసీ చేసుకోని వారికి గ్యాస్​ సరఫరా ఆగిపోయే అవకాశం ఉంటుందని డీలర్స్ అంటున్నారు.

ప్రస్తుతం గ్రేటర్ పరిధిలో 30 లక్షల కనెక్షన్లుండగా 70 శాతం మంది వినియోగదారులు మాత్రమే ఈ కేవైసీ చేసుకున్నారు. అయితే, డిమాండ్​కు సరిపడా గ్యాస్ సరఫరా కాకపోవడంతో కొన్ని కంపెనీలు ఈ కేవైసీ సాకుతో సిలిండర్ల డెలివరీ నిలిపివేసే చర్యలకు సిద్ధమవుతున్నట్టు సమాచారం.

గడువు ఇచ్చినా నిర్లక్ష్యం
2024 జూన్​లో వినియోగదారులు ఈ కేవైసీ చేసుకోవాలని ఆయిల్​కంపెనీలు ప్రకటించాయి. ముందుగా ఏడాది సమయం ఇచ్చారు. తర్వాత నిరంతర ప్రక్రియ పేరుతో కొనసాగిస్తున్నారు. అయినా వినియోగదారులు నిర్లక్ష్యంగానే వ్యవహరిస్తున్నారని అధికారులు అంటున్నారు. 

2014లోనూ ఈకేవైసీ మొదలుపెట్టి ఐదేండ్ల పాటు కొనసాగించారు. ఈసారి మాత్రం రెండేండ్లకే ముగించేలా సిద్ధమవుతున్నారు. దీనికి గ్యాస్​సరఫరాలో కొరత కారణంగా తెలుస్తున్నది.

అలాగే, గ్రేటర్ ​పరిధిలో టిఫిన్​ సెంటర్లు, చిన్న చిన్నహోటళ్లు, స్ట్రీట్ ​వెండర్లు ఇలా చాలామంది కమర్షియల్ ​గ్యాస్​ వినియోగించకుండా డొమెస్టిక్​ సిలిండర్లను వాడుతున్నారు. దీంతో ఈ కేవైసీ ద్వారా కట్టడి చేయాలని కంపెనీలు భావిస్తున్నాయి. ఈ కేవైసీ చాలా సులభంగా చేసుకునే అవకాశం ఉందని, ఆయా కంపెనీల యాప్ ల ద్వారా కానీ, డీలర్స్ వద్దకు వెళ్లి కానీ, డెలివరీ బాయ్స్ వచ్చినప్పుడు వారి ఫోన్లలో ఉండే యాప్​ద్వారా చేసుకోవచ్చంటున్నారు.