- ఎన్నికల షెడ్యూల్తో పరీక్షల తేదీల్లో మార్పులు
- రీషెడ్యూల్కు కసరత్తు చేస్తున్న టీఎస్పీఎస్సీ, విద్యాశాఖ
- ఎన్నికల తర్వాతే పరీక్షలు నిర్వహించే అవకాశం
హైదరాబాద్, వెలుగు: అసెంబ్లీ ఎన్నికల షెడ్యూల్ రావడంతో పలు పరీక్షలు వాయిదా పడే అవకాశముంది. నవంబర్లో జరగాల్సిన గ్రూప్ 2 ఎగ్జామ్ రెండోసారి పోస్ట్ పోన్ కానుంది. దీంతో పాటు అదే నెలలో నిర్వహించాలనుకున్న డీఎస్సీ పరీక్షలూ వాయిదా పడనున్నాయి. అయితే డీఎస్సీ మొత్తం ఎగ్జామ్స్ వాయిదా వేయాలా.. లేక కేవలం ఎస్జీటీ ఎగ్జామ్ మాత్రమే వాయిదా వేయాలా అనేదానిపై అధికారులు నిర్ణయం తీసుకోవాల్సి ఉంది. మరోపక్క ఈ ఎగ్జామ్స్ రీషెడ్యూల్ కోసం టీఎస్పీఎస్సీ, విద్యాశాఖ కసరత్తు చేస్తున్నాయి. త్వరలోనే అధికారిక ప్రకటన వెలువడే అవకాశముంది. గతేడాది 783 పోస్టుల భర్తీకి గ్రూప్ 2 నోటిఫికేషన్ ను టీఎస్పీఎస్సీ రిలీజ్ చేసింది. అప్పట్లో ఆగస్టు 29, 30 తేదీల్లో పరీక్షలు నిర్వహిస్తామని ప్రకటించింది. ఒకేసారి గురుకుల, ఇతర పరీక్షలకు షెడ్యూల్ రావడంతో గ్రూప్ 2 వాయిదా కోసం అభ్యర్థులు పెద్ద ఎత్తున ఆందోళన చేపట్టారు. దీంతో నవంబర్ 2, 3 తేదీల్లో గ్రూప్ 2 పరీక్ష నిర్వహిస్తామని టీఎస్పీఎస్సీ రీషెడ్యూల్ రిలీజ్ చేసింది. అయితే, ప్రస్తుతం పరీక్షలకు నెలరోజుల గడువు ఉండగా, సోమవారం అసెంబ్లీ ఎన్నికల షెడ్యూల్ ను ఎన్నికల కమిషన్ విడుదల చేసింది. దీని ప్రకారం నవంబర్ 3 నుంచి నామినేషన్ల ప్రక్రియ మొదలు కావాల్సి ఉంది. దీంతో టీఎస్పీఎస్సీ అధికారుల్లో అయోమయం నెలకొన్నది. గ్రూప్ 2 ఎగ్జామ్ కు 5,51,943 మంది అప్లై చేసుకోగా, వారికి భారీ ఎత్తున ఏర్పాట్లు చేయాల్సి ఉంటుంది. ఈ పరీక్షల నిర్వహణకు సుమారు 25 వేల మంది పోలీసులు, మరో 25 వేల మందికి పైగా రెవెన్యూ సహా ఇతర సిబ్బంది అవసరం. ఎన్నికల కోడ్ మొదలుకావడంతో రెవెన్యూ, పోలీస్ యంత్రాంగం మొత్తం ఎన్నికల ప్రక్రియలో నిమగ్నం కానుంది. దీంతో గ్రూప్ 2 నిర్వహణ నవంబర్ 2, 3 తేదీల్లో కష్టమేనని టీఎస్పీఎస్సీ భావిస్తోంది. ఇలాంటి సమయంలో పరీక్షలు నిర్వహిస్తే ఏమైనా సమస్యలు వస్తే ఇబ్బందేనని యోచిస్తోంది. దీంతో గ్రూప్ 2 కొత్త తేదీల కోసం టీఎస్పీఎస్సీ కసరత్తు చేస్తోంది. ఎన్నికల తర్వాతే గ్రూప్ 2 నిర్వహించే అవకాశం ఉంది.
డీఎస్సీ పరీక్షలూ డౌటే..!
అసెంబ్లీ ఎన్నికల ప్రభావం డీఎస్సీ ఎగ్జామ్స్పైనా పడనుంది. స్టేట్లో 5,089 టీచర్ పోస్టుల భర్తీకి ప్రస్తుతం అప్లికేషన్ల ప్రక్రియ కొనసాగుతోంది. నవంబర్ 20 నుంచి 30 వరకు డీఎస్సీ పరీక్షలు జరగనున్నాయి. ఎన్నికల షెడ్యూల్ నేపథ్యంలో ఈ పరీక్షల తేదీలు మారే అవకాశముంది. నవంబర్ 30న పోలింగ్ నేపథ్యంలో ఆ తేదీకి ముందు నాలుగు రోజులు.. తర్వాత మూడు రోజుల పాటు ఎలాంటి ఎగ్జామ్ పెట్టేందుకు అవకాశం లేదని అధికారులు భావిస్తున్నారు. ఈ నేపథ్యంలో ఈ నెల 25 నుంచి 30 వరకు జరిగే ఎస్జీటీ పరీక్షల నిర్వహణ కష్టమేనని తెలుస్తోంది. దీంతోపాటు డిసెంబర్ 1, 2 తేదీల్లో జరిగే డీఎస్సీ మైనర్ ఎగ్జామ్స్ కూడా వాయిదా పడనున్నాయి. అయితే వీటన్నింటిపైనా త్వరలోనే నిర్ణయం తీసుకునే అవకాశముంది.
