సరిగ్గా ఐదేళ్ల క్రితం.. అంటే 2014 సెప్టెంబర్ 24.. ఇస్రో కీర్తి కిరీటంలో ‘ఎర్ర’ గులాబీ చేరిన రోజు ఇది. మంగళ్యాన్ అలియాస్ మామ్ ప్రయోగం గురించే మాట్లాడేది. 2013 నవంబర్ 5న పంపిన మామ్.. అంగారకుడి కక్ష్యలోకి చేరిన రోజు. మంచంద్రయాన్ 2 ప్రయోగం సక్సెస్ అయినా విక్రమ్ ఫెయిలవడంపై యావత్ భారతావని చాలా బాధపడింది. ఆ బాధను మరిచేలా ఇస్రో చేపట్టిన మామ్ అంగారకుడి చుట్టూ తిరుగుతోంది. నిజానికి మామ్ను ఆరు నెలలే పనిచేసేలా డిజైన్ చేసినా ఐదేళ్లవుతున్నా మార్స్ చుట్టూ తిరుగుతూనే ఉంది. అమెరికా, రష్యా, యూరోపియన్ స్పేస్ ఏజెన్సీల తర్వాత మార్స్ ప్రయోగం చేసిన నాలుగో దేశంగా ఇండియా నిలిచింది. ఒక్కసారి మంగళ్యాన్ను గుర్తు చేసుకుందాం.
పీఎస్ఎల్వీ ఎక్స్ఎల్తో ప్రయోగం
నిజానికి 2008 నవంబర్ 23నే మామ్ ప్రయోగంపై ఇస్రో ప్రకటన చేసింది. జీఎస్ఎల్వీ రాకెట్తో ఉపగ్రహాన్ని కక్ష్యలోకి పంపాలని భావించింది. కానీ, ప్రయోగానికి ముందు 2010లో జీఎస్ఎల్వీ రాకెట్ రెండు సార్లు ఫెయిలవడంతో దానిని పక్కనపెట్టింది. పీఎస్ఎల్వీతో పంపిద్దామంటే, ప్రయోగానికి సంబంధించి దాని శక్తి సరిపోదాయె. అందుకే పీఎస్ఎల్వీలోనే కొంచెం శక్తిమంతమైన పీఎస్ఎల్వీ ఎక్స్ఎల్ సీ25 రాకెట్తో ప్రయోగం చేశారు. అనుకున్న టైంకు భూ కక్ష్యను దాటి మామ్ను కక్ష్యలోకి చేర్చింది రాకెట్. దాదాపు 20 రోజుల పాటు (నవంబర్ 25) వరకు భూ కక్ష్యలోనే మామ్ గడిపింది. ఆ టైంలో ఏడు సార్లు దాని కక్ష్యను మార్చారు. 25వ తేదీన ట్రాన్స్ మార్స్ ఆర్బిట్లోకి మామ్ను చేర్చారు. అక్కడి నుంచి 298 రోజులు దాన్లోని ఇంజన్లతో ప్రయాణించిన మామ్, 2014 సెప్టెంబర్ 24న మార్స్ కక్ష్యలోకి చేరింది. ఈ ప్రయోగానికి ఇస్రోకు అయిన ఖర్చు కేవలం ₹450 కోట్లు. హాలీవుడ్ సినిమా గ్రావిటీకి అయిన ఖర్చులో సగానికి సగం. ఆ టైంలో ఇస్రోకు కె. రాధాకృష్ణన్ చైర్మన్గా ఉన్నారు.
ఇదీ స్పేస్క్రాఫ్ట్
మార్స్ ఉపరితలాన్ని స్టడీ చేసేందుకు, దాని వాతావరణంలోని మీథేన్, కార్బన్ డయాక్సైడ్లను విశ్లేషించేందుకు, సౌర గాలుల తీవ్రతను తెలుసుకునేందుకు మామ్ ప్రయోగాన్ని చేసింది ఇస్రో. అందుకుగానూ ఐ–1కే మోడల్లో స్పేస్క్రాఫ్ట్ను తయారు చేసింది. అది పనిచేసేందుకు సోలార్ పానెళ్లను అమర్చింది. అంటే మార్స్ కక్ష్యలో సూర్యుడి నుంచి కరెంట్ తయారు చేసుకునేందుకు వీలుగా వాటిని ఏర్పాటు చేసింది. తయారైన కరెంట్ను నిల్వ ఉంచుకునేలా 36 లిథియం అయాన్ బ్యాటరీలను దాంట్లో పెట్టింది. దాంతో పాటు కక్ష్య పెంపు కోసం ఒక ద్రవ ఇంధన ఇంజన్నూ పెట్టారు. దాని శక్తి 440 న్యూటన్లు. కక్ష్యలో నియంత్రణ కోసం 8 చిన్న చిన్న ఇంజన్లనూ ఏర్పాటు చేశారు. 852 కిలోల ఇంధనాన్ని అందులో నింపారు. ఎత్తు, కక్ష్య నియంత్రణ కోసం మార్31750 ప్రాసెసర్, రెండు స్టార్ సెన్సర్లు, సోలార్ పానెల్ సన్ సెన్సర్, కోర్స్ అనలాగ్ సన్ సెన్సర్ వంటివి అమర్చారు.
పేలోడ్లు
ల్యాప్(ఎల్ఏపీ): లైమన్ ఆల్ఫా ఫొటోమీటర్– బరువు 1.97 కిలోలు. మార్స్ వాతావరణంలోని డ్యుటీరియం, హైడ్రోజన్ వంటి వాటిని కొలుస్తుంది. ఆ రెండింటి నిష్పత్తి తెలిస్తే, మార్స్ మీదున్న నీళ్లు ఎంత వరకు పోయాయో తెలుసుకోవచ్చు. ఒక్కసారి కక్ష్యలో తిరిగితే 60 నిమిషాల పాటు వాతావరణాన్ని అది అంచనా వేయగలదు.
మీథేన్ సెన్సర్ ఫర్ మార్స్ (ఎంఎస్ఎం): మార్స్ వాతావరణంలోని మీథేన్ను కొలిచేందుకు ఉపయోగపడుతుంది.
మార్స్ ఎక్సోస్ఫెరిక్ న్యూట్రల్ కంపోజిషన్ అనలైజర్ (ఎంఈఎన్సీఏ): మార్స్పై ఉండే న్యూట్రల్ పార్టికల్స్ను అంచనా వేస్తుంది.
థర్మల్ ఇన్ఫ్రారెడ్ ఇమేజింగ్ స్పెక్ట్రోమీటర్ (టీఐఎస్): అంగారకుడిపై విడుదలయ్యే వేడిని లెక్కిస్తుంది. రాత్రి, మధ్యాహ్నం పనిచేస్తుంది. వాతావరణంలోని కార్బన్ డయాక్సైడ్, గాలుల తీవ్రతను అంచనా వేస్తుంది. మార్స్ నేలలోని ఖనిజాలను అన్వేషిస్తుంది.
మార్స్ కలర్ కెమెరా (ఎంసీసీ): మార్స్ను వివిధ కోణాల్లో ఫొటోలు తీసేందుకు ఉపయోగపడే మూడు రంగుల కెమెరా ఇది. గాలులు, దుమ్ము తుఫాన్ల వంటి వాటిని తెలుసుకోవచ్చు.