ఆనాటి యుద్ధం...
టైటిల్ - పిప్పా
కాస్ట్ - ఇషాన్ ఖట్టర్, మృణాల్ ఠాకూర్, ప్రియాన్షు పైనియులి, సోనీ రజ్దానా
డైరెక్షన్ - రాజా కృష్ణ మీనన్
ప్లాట్ఫాం - అమెజాన్ ప్రైం వీడియో
లాంగ్వేజ్ - హిందీ
బ్రిగేడియర్ బలరామ్ సింగ్ మెహతా రాసిన ‘ది బర్నింగ్ చాఫే’ పుస్తకానికి దృశ్య రూపం ‘పిప్పా’. ఇది1971లో జరిగిన ఇండో–పాకిస్తాన్ యుద్ధానికి అక్షర రూపం. ఢాకా లైబ్రరీలో జరుగుతున్న బంగ్లా విముక్తి పోరాట సమావేశంపై పాక్ సేనలు దాడి చేసి, దొరికిన వారిని దొరికినట్టు కాల్చి చంపే సన్నివేశంతో సినిమా మొదలవుతుంది. రష్యా అందించిన యుద్ధ ట్యాంకును పరీక్షించే బృందంలో ఒకడిగా కెప్టెన్ బలరామ్గా ఇషాన్ ఖట్టర్ పాత్ర పరిచయం అవుతుంది. దాంతో పాటు విపత్కర పరిస్థితుల్లో బలరామ్ ఎంత ధైర్యంగా ఉంటాడో చెప్తుంది ఆ సీన్. యుద్ధం అంటే శత్రు సేనలను చంపుకుంటూ వెళ్లడమే కాదు. తన సేనలను కూడా రక్షించుకుంటూ ముందుకు సాగడం అని చెప్పేలా బలరామ్ చీఫ్ చేసే సాహసం ఒళ్లు గగుర్పొడుస్తుంది.
బంగ్లా విముక్తి కోసం ఉద్యమించిన వాళ్లతో పాటు సామాన్య ప్రజలను కూడా దారుణంగా చంపేస్తుంది పాకిస్తాన్ సైన్యం. ఆడవాళ్లను, పసిపిల్లలను బందీలుగా చేసుకుంటుంది. ఈ పరిస్థితుల్లో భారతదేశం బంగ్లాదేశ్ నుంచి వచ్చే శరణార్ధులకు ఆశ్రయం ఇస్తుంది. అది పాకిస్తాన్ సహించలేదు. ఇండియాలో బాంబు దాడులు చేస్తుంది. దాంతో ప్రధాని ఇందిరా గాంధీ బంగ్లా విముక్తికి పూర్తి మద్దతు ప్రకటించి, అక్కడికి సైన్యాన్ని పంపుతారు. నేల, నీళ్ల మీద నడిచే యుద్ధ ట్యాంకులను ఇండియాకు ఇస్తుంది రష్యా. వాటి సాయంతో పాక్ అధీనంలో ఉన్న గర్బీపూర్కు ఇండియా సేనలు వెళ్తాయి.
అందులో ఒక యుద్ధట్యాంకుకి నాయకత్వం వహిస్తాడు కెప్టెన్ బలరామ్ సింగ్. గర్బీపూర్ వెళ్లే క్రమంలో బలరామ్కు ఎదురైన పరిస్థితులు ఏంటి? వాటిని అతను ఎలా ఎదుర్కొన్నాడు? బలరామ్ సోదరుడు మేజర్ రామ్ మెహతా(ప్రియాన్షుకు)కు సైన్యం అప్పగించిన మిషన్ ఏంటి? వీళ్ల సోదరి రాధా మెహతా (మృణాల్) సైన్యానికి చేసిన సాయం ఏంటి? ఈ వివరాలు తెలియాలంటే సినిమా చూడాలి. పిప్పా అంటే ‘లవర్ ఆఫ్ హార్సెస్’ అని అర్థం. కెప్టెన్ బలరామ్ సింగ్ చాలా బరువైన పాత్ర. ఆ పాత్రకు ఇషాన్ ఖట్టర్ చిన్న పిల్లాడిలా కనిపించాడు.
జేమ్స్బాండ్ ఫ్లేవర్ లేదు
టైటిల్ - 007: రోడ్ టు ఎ మిలియన్
కాస్ట్ - బ్రయాన్ కాక్స్, జోష్ అలీ, జేమ్స్ బోనె, జెన్నీ డోర్వర్డ్, సన పిర్మొహమ్మద్
డైరెక్షన్ - జూలియన్ జోన్స్, టామ్ డుమికన్, జేమీ గూల్డ్, ఏలిస్ స్మిత్
ప్లాట్ఫాం - అమెజాన్ ప్రైమ్
లాంగ్వేజ్ - ఇంగ్లిష్
సినిమా తెర మీద జేమ్స్ బాండ్ చేసే అడ్వెంచర్స్ చాలా ఎగ్జయిటింగ్గా అనిపిస్తాయి. బాండ్ ఇన్స్పిరేషన్తో చేసిన అడ్వెంచరస్ రియాలిటీ షో ‘007:రోడ్ టు ఎ మిలియన్’. తొమ్మిది జంటలు ఈ అడ్వెంచర్ షోలో పాల్గొన్నాయి. జేమ్స్ బాండ్ సినిమాలు ఎక్కువగా షూటింగ్ చేసిన లొకేషన్స్కి వెళ్లి క్లూస్ ఆధారంగా అక్కడ దాచిన నిధిని కనుక్కోవాలి. అలా కనుక్కున్న వాళ్లకి తొమ్మిది మిలియన్ డాలర్ల ప్రైజ్.
ఈ షో కోసం బ్రెజిలియన్ అమెజాన్ అడవుల నుంచి ఇటలీ, ఇస్తాంబుల్ వరకు వెళ్లి షూటింగ్ చేశారు. కానీ ఈ షో మొత్తంలో బ్రయాన్ కాక్స్ హోస్ట్గా కనిపించడం ఒక్కటే ప్లస్ పాయింట్. ‘007 రేస్ టు ఎ మిలియన్’ అమెజాన్ స్టూడియోస్ డెబట్ ప్రాజెక్ట్. కానీ ఈ షో అనుకున్నంత బాగా రాలేదు. ఇంట్లో కూర్చుని అడ్వెంచర్ రియాలిటీ ఎక్స్పీరియెన్స్ చేయాలనుకునే వాళ్లు ఈ షో ఒకసారి చూడొచ్చు.
‘లేబుల్’ పడాలి
టైటిల్ - లేబుల్
కాస్ట్ - జై, తాన్యా హోప్, చరణ్ రాజ్, మహేంద్రన్, హరిశంకర్ నారాయణన్
డైరెక్షన్ - అరుణ్ రాజా కామరాజ్
ప్లాట్ఫాం - డిస్నీ + హాట్స్టార్
లాంగ్వేజ్ - తమిళం, తెలుగు, హిందీ, మలయాళం, మరాఠీ, బెంగాలి, కన్నడ
తమిళనాడులోని వాలీ నగర్ కాలనీ వాసులంతా రౌడీలు, గూండాలనే అభిప్రాయం ఉంటుంది.అలాంటి వాలీనగర్ కాలనీకి చెందిన ప్రభాకర్ (జై) పన్నెండేండ్ల వయసులో చేయని నేరానికి జువనైల్ హోంకి వెళ్లాల్సి వస్తుంది. వారం రోజుల తరువాత నిరపరాధిగా బయటకు వస్తాడు. అప్పుడు తనతో పాటు, కాలనీ వాసుల మీద ఉన్న చెడు అభిప్రాయాన్ని చెరిపేయాలని అనుకుంటాడు. ఆ లక్ష్యం చేరుకునేందుకు ‘లా’ చదివి అడ్వకేట్ అవుతాడు. జడ్జి కావాలని ట్రై చేస్తుంటాడు. దాంతోపాటు ‘వాలి నగర్’లోని యువకులను సరైన దారిలో నడిపించడానికి ప్రయత్నిస్తుంటాడు. స్పోర్ట్స్, చదువు వైపు యువతను ఎంకరేజ్ చేస్తుంటాడు. ఇదిలా ఉంటే.. ఒక వైపు ‘సెంగుట్టన్’ మరో వైపు ‘అయ్యా’ గ్యాంగులు ఆ ఏరియా మీద పట్టుకోసం పోటీపడుతుంటారు.
ఈ విషయంలో ‘సెంగుట్టన్’ దగ్గర ప్రధాన అనుచరుడైన ‘పాతాళం’, ‘అయ్య’ దగ్గర పనిచేసే బంకు సురేశ్వి ప్రధాన పాత్రలు. ఫలానా రౌడీ తాలూకు మనిషిని అనేది ఒక ‘లేబుల్’గా పనిచేస్తుంటుంది. ఆ లేబుల్ ఉన్న వాళ్లకి వ్యతిరేకంగా ఎవరూ సాక్ష్యం చెప్పరు. అలాంటివాళ్లకి జైల్లో మర్యాదలు జరుగుతుంటాయి. ఆ ‘లేబుల్’ కోసం శేఖర్, కుమార్ అనే కుర్రాళ్లు ట్రై చేస్తుంటారు. పాతాళంను చంపేస్తే ఆ లేబుల్ తమకి దక్కుతుంది అనుకుంటారు. వాళ్లను దార్లో పెట్టడానికి ఒక వైపు ప్రభాకర్ ట్రై చేస్తుంటే, మరో వైపు వాళ్లు పాతాళంను చంపడానికి ప్లాన్ చేస్తుంటారు. అదేటైంలో జడ్జి కావాలన్న ప్రభాకర్ కలకు అడ్డంకి ఏర్పడుతుంది. ఆ సమస్య ఏంటి? తమ ఏరియాకి మంచి పేరు తీసుకురావడానికి ప్రభ చేసే ప్రయత్నం ఫలిస్తుందా? అనేది మిగతా కథ. ఈ సిరీస్ మొత్తం పది ఎపిసోడ్లతో ఉంది. మూడు ఎపిసోడ్లు రిలీజ్ అయ్యాయి. ప్రతి శుక్రవారం ఒక్కో ఎపిసోడ్ విడుదల అవుతుంది.
