సికింద్రాబాద్, వెలుగు: రాష్ట్రంలో మరోసారి బీఆర్ఎస్ అధికారంలోకి వస్తుందని.. సికింద్రాబాద్ సెగ్మెంట్లో తాను హ్యాట్రిక్ సాధించడం ఖాయమని ఆ పార్టీ ఎమ్మెల్యే అభ్యర్థి తీగుల్ల పద్మారావు గౌడ్ ధీమా వ్యక్తం చేశారు. శుక్రవారం సీతాఫల్ మండి, మెట్టుగూడ, బౌద్ధనగర్ డివిజన్లో జరిగిన బీఆర్ఎస్ ప్రతినిధుల సమావేశానికి ఆయన హాజరయ్యారు.
ఈ సందర్భంగా పద్మారావు గౌడ్ మాట్లాడుతూ.. ఎన్నికల ప్రచారంలో ప్రజల నుంచి మంచి స్పందన వస్తోందన్నారు. అన్ని వర్గాల సంక్షేమానికి కృషి చేశానని ఆయన తెలిపారు. ఇయ్యాల సికింద్రాబాద్లో జరగనున్న మంత్రి కేటీఆర్ రోడ్ షో, సభకు కార్యకర్తలు భారీగా తరలిరావాలని ఆయన కోరారు. శనివారం సాయంత్రం 6 గంటలకు అడ్డగుట్టలోని రియో పాయింట్ వద్ద, మైలార్ గడ్డ ఎస్వీఎస్ సర్కిల్ వద్ద రాత్రి 7 గంటలకు కేటీఆర్ రోడ్ షో, సభ ఉంటుందని పద్మారావు గౌడ్ తెలిపారు.
