జోధ్పూర్: దేశంలో న్యాయ వ్యవస్థ సామాన్యులకు అందనంత దూరంలో ఉందని ప్రెసిడెంట్ రామ్‌‌నాథ్ కోవింద్ ఆవేదన వ్యక్తం చేశారు. ‘‘న్యాయ ప్రక్రియ ఎక్స్పెన్సివ్గా మారింది. ముఖ్యంగా సుప్రీంకోర్టు, హైకోర్టులను ఆశ్రయించడం సామాన్యులకు అసాధ్యంగా మారింది” అని ఆయన అన్నారు. రాజస్థాన్ హైకోర్టు కొత్త భవనాన్ని శనివారం ప్రారంభించిన తర్వాత ఆయన మాట్లాడారు. ‘‘ఇవ్వాళ ఎవరైనా పేద లేదా అన్నీ కోల్పోయిన వ్యక్తి తన ఫిర్యాదుతో ఇక్కడికి రాగలుగుతున్నాడా? ఈ ప్రశ్న చాలా ముఖ్యమైనది. ఎందుకంటే అందరికీ న్యాయం అందజేసే బాధ్యతను మనం స్వీకరిస్తూ రాజ్యాంగ ప్రియాంబుల్ లో పొందుపరిచాం” అని వివరించారు. న్యాయ ప్రక్రియ ఖర్చుల గురించి గతంలో మహాత్మా గాంధీ కూడా ఆందోళన వ్యక్తం చేశారని కోవింద్ గుర్తు చేశారు. 9 రీజినల్ భాషల్లో సుప్రీంకోర్టు తీర్పులు అందుబాటులోకి తీసుకురావడంపై సంతోషం వ్యక్తం చేశారు.
