- ఈనెల 31లోపు వివరాలు అప్లోడ్ చేయాలని డెడ్ లైన్
- ఉద్యోగులు, పెన్షనర్లు, ఫ్యామిలీ మెంబర్స్ వివరాల సేకరణ
హైదరాబాద్, వెలుగు: ఎంప్లాయీస్ హెల్త్ స్కీమ్(ఈహెచ్ఎస్) అమలు కోసం ప్రత్యేకంగా ఒక హెల్త్ కేర్ ట్రస్ట్ ను ఏర్పాటు చేయాలని, అందుకోసం ఉద్యోగుల సమగ్ర సమాచారాన్ని సేకరించాలని ప్రభుత్వం నిర్ణయించింది. ఈ మేరకు రాష్ట్రంలోని డీఎంహెచ్వోలకు డైరెక్టర్ ఆఫ్ పబ్లిక్ హెల్త్ డాక్టర్ రవీందర్ నాయక్ కీలక ఆదేశాలు జారీ చేశారు.
1972 నాటి తెలంగాణ ఇంటిగ్రేటెడ్ మెడికల్ అటెండెన్స్ రూల్స్ సెక్షన్ 7 ప్రకారం అర్హులైన వారి డేటాను సేకరించాలని డైరెక్టర్ ఉత్తర్వుల్లో పేర్కొన్నారు. ప్రభుత్వ ఉద్యోగులు, పెన్షనర్లు మాత్రమే కాకుండా వారిపై ఆధారపడిన కుటుంబ సభ్యుల వివరాలను కూడా సేకరించాలన్నారు.
ఐఎఫ్ఎంఎస్ పోర్టల్ లో నమోదు..
సేకరించిన డేటాను నిర్ణీత ప్రోఫార్మాలో (ఐఎఫ్ఎంఎస్ హెచ్ఆర్) మాడ్యూల్ ద్వారా ఆన్లైన్లో అప్లోడ్ చేయాల్సి ఉంటుంది. ఆయా విభాగాల డ్రాయింగ్ అండ్ డిస్బర్సింగ్ ఆఫీసర్స్ తమ లాగిన్ల ద్వారా ఈ వివరాలను మే 31లోపు తప్పనిసరి పూర్తిచేయాలని ఆదేశించారు. తక్కువ సమయం ఉన్నందున యుద్ధప్రాతిపదికన ఈ ప్రక్రియను పూర్తి చేయాలని సూచించారు. ఈ డేటా సేకరణ అంశాన్ని టాప్ ప్రయారిటీగా పరిగణించాలని అధికారులకు డైరెక్టర్ స్పష్టం చేశారు.
