గోషామహల్, వెలుగు: తెలంగాణలో గోవుల అక్రమ రవాణా ఘటనలను అరికట్టేందుకు కఠిన చర్యలు తీసుకోవాలని రాష్ట్ర డీజీపీ సీవీ ఆనంద్కు గోషామహల్ ఎమ్మెల్యే రాజా సింగ్ బహిరంగ లేఖ రాశారు. రాష్ట్రంలో చట్టం అందరికీ సమానంగా అమలు కావాలని ఆయన డిమాండ్ చేశారు. గత శనివారం రాత్రి గోవులతో వెళ్తున్న ఓ లారీని గోరక్ష దళ్ కార్యకర్తలు అడ్డుకున్న ఘటనను రాజా సింగ్ లేఖలో ప్రస్తావించారు.
ఆ సమయంలో అక్కడికి చేరుకున్న ఎంఐఎం నాంపల్లి ఎమ్మెల్యే మాజిద్ హుస్సేన్ ఆ లారీని తీసుకువెళ్లడం పలు అనుమానాలకు తావిస్తోందన్నారు. ఈ ఘటనపై పూర్తి స్థాయిలో విచారణ జరిపి, బాధ్యులపై చర్యలు తీసుకోవాలని కోరారు. గోవుల అక్రమ రవాణా చేస్తున్న వారిపై వెంటనే కేసులు నమోదు చేయాలని, పోలీసులు రాజకీయ ఒత్తిళ్లకు లోనుకాకుండా విధులు నిర్వర్తించాలని విజ్ఞప్తి చేశారు.
