కూలిన గోడలు, దెబ్బతిన్న ఇండ్లు, నేలమట్టమైన షాపింగ్ మాల్స్... చెల్లాచెదురుగా పడిఉన్న మట్టిపెళ్లలు, సిమెంట్ దిమ్మెలు... ఇలాంటి చోటే వీళ్లకు పార్టీ ప్లాట్ఫామ్స్. అక్కడే మ్యూజిక్ వింటూ హుషారుగా డాన్స్ చేస్తారు. వీళ్లందరూ ఉక్రెయిన్కి చెందిన యువత. ఈ డాన్స్ పార్టీ వెనక.. యుద్ధం కారణంగా దెబ్బతిన్న ఇండ్లని బాగు చేసుకుంటున్న వాళ్లకు సాయపడాలనే మంచి ఆలోచన ఉంది.
రష్యా సైనికుల మిస్సైల్ దాడిలో ఉక్రెయిన్లోని సిటీలు, ఊళ్లలో చాలా ఇండ్లు కూలిపోయాయి. వాటిని రిపేర్ చేసేందుకు దాచుకున్న పైసలు, పెన్షన్ డబ్బులు చాలక ఇబ్బంది పడుతున్నారు చాలామంది. వాళ్లకు తమ వంతు సాయం చేయాలనుకున్నారు అక్కడి యంగ్స్టర్స్. 200 మంది కలిసి ‘రిపేర్ టుగెదర్’ అనే గ్రూప్గా ఏర్పడ్డారు. అందులో నైట్క్లబ్స్లో మ్యూజిక్ వినేందుకు వెళ్లే వాళ్లే ఎక్కువ. డాన్స్ పార్టీలు మిస్ అయిన ఫీలింగ్ రాకుండా ఉండేందుకు కూలిపోయిన బిల్డింగ్స్ దగ్గరే డాన్స్ పార్టీలు పెడుతున్నారు. వాళ్ల ఆలోచన నచ్చి, చాలామంది డొనేషన్స్ ఇస్తున్నారు. ఆ డబ్బుని ఇండ్లను రిపేర్ చేసేందుకు ఖర్చు చేస్తున్నారు వీళ్లు.
15 ఇండ్లను రిపేర్ చేశారు
ముందుగా పారలు అందుకొని కూలిన ఇండ్లలోని మట్టి, సిమెంట్ పెళ్లల్ని ఒకచోట కుప్పగా పోస్తారు. అక్కడే డీజె, మ్యూజిక్ బాక్స్లు పెట్టి డాన్స్ చేస్తారు. డాన్స్ పార్టీల ద్వారా వచ్చిన డబ్బుతో యహిడ్నె అనే ఊళ్లో కల్చరల్ సెంటర్ని బాగు చేశారు. ‘రిపేర్ టుగెదర్’లో ఇది వాళ్ల ఎనిమిదో ప్రాజెక్ట్. ఇప్పటివరకు ఆ గ్రామంలో 15 ఇండ్లను బాగు చేశారు. మరో 15 ఇండ్ల తలుపులు, కిటికీలు రిపేర్ చేశారు. మరో 12 ఇండ్లు బాగు చేయాలని టార్గెట్ పెట్టుకున్నారు. వీళ్లకు సపోర్ట్గా ఉండి పనిచేసేందుకు పోర్చుగల్, అమెరికా, జర్మనీ, ఫిన్లాండ్ నుంచి కొందరు యంగ్స్టర్స్ చేరారు.
ఇప్పుడు ఇదే నార్మల్ లైఫ్
‘‘నాకు మ్యూజిక్ అంటే ఇష్టం. కానీ, రష్యా యుద్ధం వల్ల పార్టీలని మిస్ అవుతున్నాం. మునపటిలా భయం లేకుండా హాయిగా బతికే రోజులు రావాలని కోరుకుంటున్నాం. ఇప్పటికైతే మాకు నార్మల్ లైఫ్ అంటే వలంటీర్గా పనిచేయడమే. బాంబు దాడుల్లో చాలా ఇండ్లు కూలిపోయాయి. ప్రజలకు చేతనైన సాయం చేయాలనుకున్నాం. అందుకోసం మ్యూజిక్ పార్టీలు పెడుతున్నాం’’ అంటున్నాడు ‘రిపేర్ టుగెదర్’ కార్యక్రమం ఆర్గనైజర్ టానియా బురియనొవ.