హైదరాబాద్, వెలుగు: టీఏఎఫ్ఆర్సీ ఇదివరకే నిర్ణయించిన ఫీజులను ఒప్పుకోని 25 ప్రైవేటు ఇంజినీరింగ్ కాలేజీల ప్రతినిధులతో అధికారులు సోమవారం మరోసారి భేటీ కానున్నారు. 173 ఇంజినీరింగ్ కాలేజీల్లో 2022-25 బ్లాక్ పీరియడ్కు ఫీజులను నిర్ణయించేందుకు టీఏఎఫ్ఆర్సీ జులైలో మేనేజ్మెంట్లతో హియరింగ్ నిర్వహించింది. ఆడిటింగ్లో తప్పులు దొర్లాయని గతనెలలో మరోసారి భేటీ కాగా.. 90కి పైగా కాలేజీల్లో ఫీజులు తగ్గాయి. ఫీజులు భారీగా తగ్గాయని 25 కాలేజీల వాళ్లు అభ్యంతరాలు తెలిపారు. దీంతో టీఏఎఫ్ఆర్సీ పూర్తిస్థాయి కమిటీ వాళ్లతో సోమవారం భేటీ కానుంది. ఇందులో నిర్ణయించే ఫీజులే ఫైనల్ కానున్నాయి. ఈ 25 కాలేజీలతో పాటు ఇప్పటికే నిర్ణయించిన కాలేజీల ఫీజుల ప్రతిపాదనలను, ఎంబీఏ.. ఎంసీఏ ఫీజుల వివరాలనూ సర్కారుకు పంపించనున్నారు.
