న్యూఢిల్లీ, వెలుగు: తెలంగాణ హైకోర్టుకు కొత్తగా ముగ్గురు జడ్జిలు రానున్నారు. ఇందులో ఇద్దరు అడ్వకేట్లు లక్ష్మీనారాయణ అలిశెట్టి, అనిల్ కుమార్ జూకంటి, జ్యుడీషియల్ ఆఫీసర్ సుజన కళాసికం ఉన్నారు. ఈ మేరకు సీజేఐ జస్టిస్ డీవై చంద్రచూడ్, జస్టిస్ సంజయ్ కౌశల్, జస్టిస్ సంజీవ్ ఖన్నాతో కూడిన కొలీజియం బుధవారం నిర్ణయం తీసుకుని కేంద్ర ప్రభుత్వానికి సిఫార్సు చేసింది.
గతేడాది అక్టోబర్లో జ్యుడీషియల్ ఆఫీసర్ సుజన కళాసికం, డిసెంబర్లో అడ్వకేట్లు లక్ష్మీనారాయణ అలిశెట్టి, అనిల్ కుమార్ జూకంటి పేర్లను తెలంగాణ హైకోర్టు కొలీజియం ప్రతిపాదించింది. ఈ ముగ్గురి పేర్లకు గవర్నర్, సీఎం ఆమోదముద్ర వేశారు. దీంతో సుప్రీంకోర్టు కొలీజియం కూడా ఈ ముగ్గురి పేర్లను కేంద్రానికి సిఫార్సు చేసింది. కొలీజియం సిఫార్సులకు కేంద్రం అంగీకారం తెలిపి, ఆపై రాష్ట్రపతి ఆమోదం పొందితే.. ఈ ముగ్గురు తెలంగాణ హైకోర్టు జడ్జిలుగా నియమితులు కానున్నారు.
