దుబ్బాక ఉప ఎన్నికల్లో టీఆర్ఎస్ ప్రభుత్వ వైఫల్యాలే తమ ప్రధాన ఎజెండా అన్నారు పీసీసీ ప్రెసిడెంట్ ఉత్తమ్ కుమార్ రెడ్డి. దుబ్బాక ఉప ఎన్నికల్లో భాగంగా బుధవారం మెదక్ జిల్లా కాంగ్రెస్ పార్టీ ఆధ్యక్షులు కంఠారెడ్డి తిరుపతి రెడ్డి ఆధ్వర్యంలో నిర్వహించిన నార్సింగి మండల ముఖ్య కార్యకర్తల సమావేశంలో ఆయన పాల్గొన్నారు. ఈ సందర్భంగా మాట్లాడిన ఉత్తమ్..దుబ్బాక నియోజకవర్గంలో మాజీ మంత్రి చెరుకు ముత్యం రెడ్డి చేసిన అభివృద్ధి పనులు తప్ప గడచిన ఆరేళ్లలో టీఆర్ఎస్ ప్రభుత్వ హయాంలో కొత్తగా జరిగిన అభివృద్ధి ఏమి లేదన్నారు. కేసీఆర్ ప్రభుత్వం ఎన్నికల సమయంలో ఇచ్చిన ఏ ఒక్క హామీ కూడా నెరవేరచ్చలేదన్నారు. ఈ విషయంపై నియోజకవర్గ ప్రజలు ఆగ్రహంగా ఉన్నారన్నారు. అభివృద్ధి పట్టించుకోని, తమ సమస్యలు తీర్చని టీఆర్ఎస్ ప్రభుత్వానికి ఈ ఎన్నికల్లో తగిన గుణపాఠం చెబుతారన్నారు. కాంగ్రెస్ పార్టీ నాయకులు, కార్యకర్తలు ప్రభుత్వం వైఫల్యాలు, అవలంభిస్తున్న ప్రజా వ్యతిరేఖ విధానాలు ప్రజలకు వివరించి కాంగ్రెస్ పార్టీ క్యాండిడేట్కు మద్దతు కూడగట్టాలని, ఎన్నికల్లో గెలుపుకోసం చిత్తశుద్దితో కృషి చేయాలని కోరారు. ఈ సమావేశంలో మాజీ మంత్రి షబ్బీర్ అలీ తో పాటు పార్టీ ముఖ్య నాయకులు పాల్గొన్నారు.
