ముషీరాబాద్, వెలుగు: రాష్ట్ర ప్రభుత్వం ఇటీవల ప్రకటించిన వడ్డెర కార్పొరేషన్ చైర్మన్ నియామకంపై పునరాలోచించి, ఆ పేరును వెంటనే మార్చాలని తెలంగాణ వడ్డెర సంఘం చారిటబుల్ ట్రస్ట్ అధ్యక్షుడు శివరాత్రి అయిలిమల్లు డిమాండ్ చేశారు. ఆదివారం ఇందిరాపార్కు ధర్నా చౌక్లో ట్రస్ట్ ఆధ్వర్యంలో చేపట్టిన నిరసన ధర్నాలో ఆయన మాట్లాడారు.
వడ్డెరుల సమస్యలు, స్థితిగతులపై ఎలాంటి అవగాహన లేని గుంజ రేణుకను చైర్మన్గా నియమించడం వల్ల తమ సామాజిక వర్గానికి తీవ్ర నష్టం జరుగుతుందన్నారు. వడ్జెరుల సమస్యలపై అవగాహన ఉన్న వ్యక్తులనే ఈ పదవిలో నియమించాలని కోరారు. లేనిపక్షంలో రాష్ట్రవ్యాప్తంగా ఉన్న వడ్డెరులను సమీకరించి ‘చలో సచివాలయం’ ముట్టడి కార్యక్రమాన్ని చేపడతామని హెచ్చరించారు. నిరసనలో కె. అంజయ్య, ఎత్తరి గణేశ్, గుర్రం శ్రీనివాస్, శివరాత్రి బిక్షం, మంజుల నాగేశ్ పాల్గొన్నారు.
