- చైర్మన్గా బాధ్యతల స్వీకరణ
- కొత్త సభ్యుల ప్రమాణ స్వీకారం
హైదరాబాద్, వెలుగు : తెలంగాణ స్టేట్ పబ్లిక్ సర్వీస్ కమిషన్ (టీఎస్పీఎస్సీ) ప్రతిష్టను పెంచేలా పనిచేస్తామని కమిషన్ చైర్మన్ మహేందర్ రెడ్డి అన్నారు. టీఎస్పీఎస్సీ చైర్మన్గా శుక్రవారం ఆయన బాధ్యతలు స్వీకరించారు. అనంతరం కమిషన్ కొత్త సభ్యులు అనితా రాజేంద్ర, ప్రొఫెసర్ యాదయ్య, పాల్వాయి రజనీకుమారితో ఆయన ప్రమాణం చేయించారు. తర్వాత కమిషన్ ఆఫీసులో జాతీయ జెండా ఎగురవేసి, గార్డ్ ఆఫ్ హానర్ స్వీకరించారు. ఈ సందర్భంగా ఆయన మాట్లాడుతూ.. రిపబ్లిక్ డే సందర్భంగా బాధ్యతలు తీసుకోవడం సంతోషంగా ఉందన్నారు.
టీఎస్పీఎస్సీ అధికారులు, సిబ్బంది ఒక టీమ్గా కలిసి పనిచేద్దామని పిలుపునిచ్చారు. తరతమ భేదాలు లేకుండా, అందరికీ సమాన అవకాశాలు కల్పించేందుకు సర్కారు నిర్ణయించే గైడ్లైన్స్కు అనుగుణంగా రిక్రూట్మెంట్ ప్రాసెస్ పూర్తి చేసేందుకు కృషి చేద్దామన్నారు. భారత రాజ్యాంగం ద్వారా సంక్రమించిన ఈ బాధ్యతను ప్రజలు మెచ్చేవిధంగా నిర్వర్తించేలా ప్రతిన బూనాలని సభ్యులను కోరారు. రాబోయే కాలంలో కమిషన్ వేసే ప్రతి అడుగు సంస్థ ప్రతిష్టను పెంచేలా, ప్రజల ఆశయాలను నెరవేర్చే విధం గా ఉంటుందన్నారు. కార్యక్రమంలో టీఎస్పీఎస్సీ సెక్రటరీ అనితా రాంచంద్రన్, కమిషన్ మెంబర్ అరుణకుమారి, అధికారులు, సిబ్బంది పాల్గొన్నారు.
