వైట్ డిశ్చార్జ్(తెల్లబట్ట).. చాలామంది ఆడవాళ్లు దీన్నో హెల్త్ ఇష్యూగా చూడరు. కానీ ఆ డిశ్చార్జ్ పసుపు, ఆకుపచ్చ రంగులోకి మారినా, రక్తంతో కలిసి వచ్చినా, చెడు వాసన వచ్చినా ఆలోచించాలి. కొన్నిసార్లు వజైనాలో విపరీతమైన మంట, దురద కూడా వస్తుంటాయి. ఇవన్నీ కలిపి ఉన్నాయంటే కారణం వజైనల్ ఇన్ఫెక్షన్. ఈ పరిస్థితిని అస్సలు నిర్లక్ష్యం చేయకూడదు అంటున్నారు గైనకాలజిస్ట్ ఎమ్. రజిని. అసలు ఈ ఇన్ఫెక్షన్స్ ఎందుకొస్తాయి? వీటి తీవ్రత ఎలా ఉంటుంది?
ఇవి ఎన్ని రకాలు? అనే విషయాలతో పాటు ఈ సమస్య నుంచి బయట పడేందుకు ఎలాంటి జాగ్రత్తలు తీసుకోవాలో ఆమె మాటల్లోనే..
వజైనల్ ఇన్ఫెక్షన్స్ అంటే..
ఆడవాళ్లకి మెనుస్ట్రువల్ ఫ్లూయిడ్ బయటికి రావడానికి వజైనా ట్రాక్ ఉంటుంది. ఆ ట్రాక్ నుంచి ఆడవాళ్లకి కొద్ది మొత్తంలో వైట్ డిశ్చార్జ్ అవుతుండటం మామూలే. కానీ, ఆ డిశ్చార్జ్లో మార్పులు కనిపించినా.. వజైనా పొడిబారి మంట, దురద లాంటివి వచ్చినా. యూరిన్లో మంట, దురద వచ్చినా. అప్పుడప్పుడు స్పాటింగ్ కనిపించినా.. వజైనల్ ఇన్ఫెక్షన్స్ ఉన్నట్టే.
ఈ ఇన్ఫెక్షన్స్ ఎక్కువగా ఎందువల్ల వస్తాయి?
ఫంగస్‌ వల్ల కానీ ప్రోటోజువా జాతికి చెందిన ట్రైకోమొనాస్ అనే పరాన్న జీవి వల్ల లేదా బ్యాక్టీరియా వల్ల కానీ ఈ ఇన్ఫెక్షన్స్ వస్తాయి. రక్తహీనత, ఇమ్యూనిటీ తక్కువగా ఉండటం, వజైనల్ ఫ్లోరాలో పీహెచ్ ఆల్టరేషన్స్ అయినప్పుడు, నార్మల్ బ్యాక్టీరియా ఫ్లోరా దెబ్బతిన్నప్పుడు, ప్రైవేట్ పార్ట్స్లో సబ్బులు, పెర్ఫ్యూమ్లు వాడటం, డయాబెటిస్, ఊబకాయం.. ఇలా వజైనల్ ఇన్ఫెక్షన్స్కి దారితీసే కారణాలు చాలానే ఉన్నాయి. ఆ కారణాల్ని బట్టే ఏ రకం వజైనల్ ఇన్ఫెక్షన్ సోకిందన్నది నిర్థారించుకుంటాం.
వజైనల్ ఇన్ఫెక్షన్స్లో ఎన్ని రకాలున్నాయి?
ఈ ఇన్ఫెక్షన్స్లో చాలా రకాలు ఉన్నప్పటికీ.. వాటిల్లో ముఖ్యంగా వీటి గురించి చెప్పుకోవాల్సినవి ఇవి.
బ్యాక్టీరియల్: సాధారణంగా వజైనాలో మంచి బ్యాక్టీరియా, చెడు బ్యాక్టీరియా రెండూ ఉంటాయి. ఈస్ట్రోజన్ హార్మోన్ ప్రభావం వల్ల మంచి బ్యాక్టీరియా అయిన ల్యాక్టోబాసిల్లి నుంచి విడుదలయ్యే ల్యాక్టిక్ యాసిడ్ వజైనాలో ఎసిడిక్ పీహెచ్ ఉండేలా చూస్తుంది. అది చెడు బ్యాక్టీరియాను డెవలప్ కానీయదు. కానీ, కొన్ని సందర్భాల్లో వజైనాలో పీహెచ్ ఇంబ్యాలెన్స్ అవుతుంది. దానివల్ల చెడు బ్యాక్టీరియా, రోగ కారక క్రిములు పెరిగి బ్యాక్టీరియల్ వజైనాసిస్ ఇన్ఫెక్షన్ వస్తుంది. ముఖ్యంగా వజైనాలో గార్డెనెరిల్లా అనే బ్యాక్టీరియా ఎక్కువగా పెరగడం వల్ల ఈ ఇన్ఫెక్షన్ వస్తుంది.
వజైనల్ ఫంగల్ ఇన్ఫెక్షన్: ఈఇన్ఫెక్షన్‌ ‘క్యాండిడా’ అనే ఫంగస్‌ వల్ల వస్తుంది. నోరు, గొంతు, జీర్ణ వ్యవస్థతో పాటు వజైనాలోనూ సాధారణంగానే ‘క్యాండిడా’ ఉంటుంది. కానీ, కొన్నిసార్లు దీని ఉత్పత్తి విపరీతంగా పెరుగుతుంది. దానివల్ల ఫంగల్ ఇన్ఫెక్షన్ వస్తుంది. ముఖ్యంగా రక్తహీనత, డయాబెటిస్ ఉన్నవాళ్లలో, యాంటీ బయాటిక్స్, ఓరల్‌ కాంట్రాసెప్టివ్‌ పిల్స్‌ , స్టిరాయిడ్స్ఎక్కువగా వాడే వాళ్లలో ఈ రకం ఇన్ఫెక్షన్ కనిపిస్తుంటుంది.
క్లెమీడియా ఇన్ఫెక్షన్ : క్లెమీడియా ట్రాకోమాటిస్ అనే బ్యాక్టీరియా వల్ల ఈ ఇన్ఫెక్షన్ వస్తుంది. ఇది ఇంటర్కోర్స్(సంభోగం) వల్ల ఒకరి నుంచి మరొకరికి ట్రాన్స్ఫర్ అవుతుంది. ఇన్ఫెక్షన్‌‌ని నిర్లక్ష్యం చేస్తే క్లెమీడియా బ్యాక్టీరియా వజైనా నుంచి గర్భాశయంలోకి కూడా వెళ్తుంది. ఈ ఇన్ఫెక్షన్ వల్ల కొన్నిసార్లు ఫెలోపియన్ ట్యూబ్స్ మూసుకుపోయి, ప్రెగ్నెన్సీకి ఇబ్బందులొస్తాయి. క్లెమీడియా ఇన్ఫెక్షన్ ఒకసారి వచ్చిపోయినా, ఒక్కొక్కరి శరీరతత్వాన్ని బట్టి, వాళ్ల రోగనిరోధకశక్తిని బట్టి ఇంటర్ కోర్స్ తర్వాత మళ్లీ కూడా వచ్చే అవకాశాలు ఉంటాయి.
గనేరియా ఇన్ఫెక్షన్స్: క్లెమీడియాలానే గనేరియా కూడా సెక్సువల్లీ ట్రాన్స్మిటెడ్ ఇన్ఫెక్షన్. నీసేరియా గనేరియా అనే బ్యాక్టీరియా వల్ల ఈ ఇన్ఫెక్షన్ వస్తుంది. ఇది కూడా వజైనా నుంచి మూత్రనాళాల్లోకి, గర్భాశయంలోకి, కొన్నిసార్లు ఫెలోపియన్ ట్యూబ్స్లోకి కూడా వెళ్తుంది.
నాన్ ఇన్ఫెక్షన్ వెజినైటిస్: వజైనా పొర దెబ్బతిన్నప్పుడు ఈ ఇన్ఫెక్షన్ వస్తుంది. కెమికల్స్తో నిండిన సబ్బులు, పెర్ఫ్యూమ్స్, లోషన్స్, క్రీమ్స్ని ప్రైవేట్ పార్ట్స్లో వాడటం వల్ల ఈ ఇన్ఫెక్షన్ ఎక్కువగా వస్తుంది.
ఇన్ఫెక్షన్ ఏ స్థాయిలో ఉందనేది ఎలా తెలుసుకోవచ్చు?
లక్షణాలని బట్టి ఇన్ఫెక్షన్ ఉందో, లేదో తెలుసుకోవచ్చు. మొదట బేసిక్ ట్రీట్మెంట్ ఇస్తాం. దానికి కూడా కంట్రోల్ అవ్వకపోతే కంప్లీట్ యూరిన్ టెస్ట్, యూరిన్ కల్చర్, కంప్లీట్ బ్లడ్ పిక్చర్, వెజైనల్ స్వాబ్ లాంటి టెస్ట్లు చేయాలి. వాటి ద్వారా ఇన్ఫెక్షన్కి కారణం, అది ఏ స్థాయిలో ఉందో తెలుసుకోవచ్చు. దాన్ని బట్టి మందులు వాడితే సరిపోతుంది.
బిగుతు బట్టలు కూడా కారణమా?
టైట్ లెగ్గింగ్స్, జీన్స్, నైలాన్ ప్యాంటీస్ వల్ల వజైనల్ ఇన్ఫెక్షన్స్ వచ్చే అవకాశం ఉంది. అవి ఎక్కువ సేపు వేసుకోవడం వల్ల ప్రైవేట్ పార్ట్స్లో చెమట బాగా పడుతుంటుంది. ఆ తేమ వజైనల్ ఇన్ఫెక్షన్కి కారణం అవుతుంది. అలాగే వర్కవుట్, స్విమ్మింగ్‌, స్నానం లాంటివి చేశాక వజైనాలో తేమ లేకుండా చూసుకోవాలి.
ఇన్ఫెక్షన్ ఉన్నప్పుడు ప్యాంటీస్ అవాయిడ్ చేయాలా?
లేదు..దానివల్ల సమస్య పెరుగుతుందే తప్ప తగ్గదు. చాలామంది వజైనల్ ఇన్ఫెక్షన్స్ వచ్చినప్పుడు ప్యాంటీస్ వేసుకోరు. దానివల్ల ఆ డిశ్చార్జ్ బయటకు స్ర్పెడ్ అవుతుంది. దాంతో తొడల మధ్యలో ర్యాష్, మంట వస్తాయి. అందుకే ప్యాంటీస్ కంపల్సరీ. అయితే రెండు మూడు గంటలకొకసారి ప్యాంటీస్ మార్చాలి. కాటన్ ప్యాంటీస్ మాత్రమే వేసుకోవాలి. అలాగే పీరియడ్స్(నెలసరి) అప్పుడు శానిటరీ న్యాప్కిన్స్ పూర్తిగా తడిసినా, తడవకపోయినా ఆరు గంటలకి ఒకసారి మార్చుకోవాలి. ఆర్గానిక్ న్యాప్కిన్స్ మాత్రమే వాడాలి.
వీటి ప్రభావం ప్రెగ్నెన్సీపై పడుతుందా?
కొన్ని రకాల ఇన్ఫెక్షన్స్ వల్ల ఫెలోపియన్ ట్యూబ్స్ బ్లాక్ అవుతాయి. దాంతో పిండం గర్భాశయంలోకి కాకుండా అక్కడే పెరుగుతుంది. దాన్నే ఎక్టోపిక్ ప్రెగ్నెన్సీ అంటారు. దీన్ని త్వరగా గుర్తించకపోతే ఫెలోపియన్ ట్యూబ్స్ పగిలిపోయి ప్రాణాలకే ప్రమాదం వస్తుంది. అలాగే కొన్ని రకాల ఇన్ఫెక్షన్స్ వజైనా నుంచి గర్భ సంచి ఎండోమెట్రియం(గర్భాశయపు లోపలి మ్యూకస్ పొర) వరకు వెళ్తాయి. దానివల్ల అబార్షన్స్ అయ్యే అవకాశం ఉంటుంది.
సర్వైకల్ క్యాన్సర్కు ముందు ఇన్ఫెక్షన్స్ వస్తాయా?
కొన్నిసార్లు సర్వైకల్ క్యానర్స్ రాకముందు స్కిన్ మీద దెబ్బతెగలి పొట్టు ఊడితే ఎలా ఉంటుందో.. సర్విక్స్ మీద కూడా అలా ఎరోజన్స్ ఏర్పడతాయి. అలాంటప్పుడు ఎక్కువ డిశ్చార్జ్ అవు తుంటుంది.
వజైనల్ ఇన్ఫెక్షన్స్ ఏ ఏజ్లో ఎక్కువ?
రిప్రొడక్టివ్ ఏజ్ గ్రూప్ అంటే 18 నుంచి 35 యేండ్ల మధ్య ఆడవాళ్లకి ఈ ఇన్ఫెక్షన్స్ ఎక్కువగా వస్తుంటాయి. వీటి నుంచి తప్పించుకోవాలంటే ప్రైవేట్ పార్ట్స్ని క్లీన్గా ఉంచుకోవడంతో పాటు తడి లేకుండా చూసుకోవాలి. పీరియడ్స్లో శానిటరీ న్యాప్కిన్స్ మార్చుకునేముందు చేతుల్ని శుభ్రం చేసుకోవాలి. ఇమ్యూనిటీ బూస్ట్ డైట్ని తీసుకోవాలి. పప్పులు, బాయిల్డ్ ఎగ్స్ లాంటి హై ప్రొటీన్ ఫుడ్ని ఎక్కువగా తినాలి. యాపిల్, సంత్రా లాంటి యాంటీ ఆక్సిడెంట్ రిచ్ ఫ్రూట్స్ని తినాలి. విటమిన్–డి ఎక్కువగా ఉండే ఫుడ్ తీసుకోవాలి. మంచి బ్యాక్టీరియాని పెంచే పెరుగు ఎక్కువగా తినాలి. అయితే ఇవన్నీ పాటించినా కూడా వజైనల్ ఇన్ఫెక్షన్స్ వచ్చే అవకాశాలు ఉంది. అలాంటప్పుడు వెంటనే డాక్టర్ని కన్సల్ట్ అవ్వాలి. భార్యా భర్తలు, పార్ట్నర్స్లో ఏ ఒక్కరికి ఇన్ఫెక్షన్ ఉన్నా మరొకరు కూడా ట్రీట్మెంట్ తీసుకోవాలి.
