- అనుమానితులను వారెంట్లేకుండానే అరెస్టు చేయొచ్చు
- నాన్ బెయిలబుల్,రాజీ చేసుకునే చాన్స్ ఉండదు
న్యూఢిల్లీ: ప్రభుత్వ నియామక పరీక్షల్లో క్వశ్చన్ పేపర్ లీకేజీలు, కాపీయింగ్ వంటి మోసపూరిత పద్ధతులను అరికట్టేందుకు తీసుకొచ్చిన పబ్లిక్ ఎగ్జామినేషన్స్ (ప్రివెన్షన్ ఆఫ్ అన్ ఫెయిర్ మీన్స్) బిల్లును లోక్సభ మంగళవారం ఆమోదించింది.
ఈ బిల్లు ప్రకారం పేపర్లు లీక్ చేసినా, ఆన్సర్ షీట్లు ట్యాంపర్ చేసినా పదేండ్ల జైలు, రూ.1 కోటి ఫైన్ విధించేలా ప్రతిపాదించారు. అలాగే ఇందులో పేర్కొన్న నేరాలు నాన్- బెయిలబుల్, నాన్ -కాంపౌండ్ చేయదగినవి, రాజీ ద్వారా పరిష్కరించుకునే చాన్స్ లేదు. వారెంట్ లేకుండానే అనుమానితులను అరెస్టు చేసే అధికారం పోలీసులకు కల్పించారు.
ధరల కట్టడికి చర్యలు: సీతారామన్
ధరల పెరుగుదలను అదుపుచేసేందుకు ప్రభుత్వం చర్యలు చేపడుతోందని కేంద్ర ఆర్థిక మంత్రి నిర్మలా సీతారామన్ తెలిపారు. నాసిరకం వస్తువుల కట్టడికి తీసుకున్న చర్యల వల్ల ద్రవ్యోల్బణం(ఇన్ఫ్లేషన్) అదుపుచేయగల స్థాయికి తగ్గిందని చెప్పారు. మంగళవారం రాజ్యసభలో ఆమె ఒక ప్రశ్నకు సమాధానమిస్తూ దేశంలో రిటైల్ ఇన్ఫ్లేషన్ 2022లో 6.8 శాతం ఉండేదని.. 2023లో దాన్ని 5.5 శాతానికి తగ్గించినట్లు చెప్పారు. త్వరగా పాడైపోయేవి, ఇండియాలో పండని పంటల కొరత వల్ల ఏర్పడే ఇబ్బందులను తగ్గించేందుకు ప్రయత్నిస్తున్నామని వివరించారు. ‘భారత్ దాల్’ పేరుతో కేజీ శనగపప్పును రూ.60కే అమ్ముతున్నట్లు చెప్పారు. అలాగే తక్కువ ధరలో ‘భారత్ బియ్యం’ కూడా అందుబాటులోకి తెచ్చినట్లు పేర్కొన్నారు.
పీఎం- కిసాన్ పెంచే ఆలోచన లేదు: కేంద్రం
పీఎం-కిసాన్ పథకం కింద రైతులకు ఏటా అందిస్తున్న ఆర్థిక సాయం రూ.6 వేలను.. రూ.8 వేల నుంచి- రూ.12వేలకు పెంచే ప్రతిపాదన లేదని పరిశీలనలో ప్రభుత్వం పార్లమెంటులో తెలిపింది. మంగళవారం కేంద్ర వ్యవసాయ మంత్రి అర్జున్ ముండా ఓ ప్రశ్నకు లిఖితపూర్వక సమాధానంలో ఈ విషయం వెల్లడించారు. కాగా, 60 ఏండ్ల తర్వాత రైతుకు రూ.3 వేలు పెన్షన్ అందించే ప్రధాన్ మంత్రి కిసాన్ మాన్ధన్ యోజన(పీఎంకేఎంవై) కింద దేశవ్యాప్తంగా మొత్తం 23,38,720 మంది రైతులు తమ పేర్లు నమోదు చేసుకున్నట్లు అర్జున్ ముండా లోక్సభకు వెల్లడించారు. వ్యవసాయ శాఖ మాజీ కార్యదర్శి సంజయ్ అగర్వాల్ నేతృత్వంలోని కనీస మద్దతు ధర(ఎంఎస్పీ) కమిటీ ఇప్పటి వరకు 37 మీటింగ్లు నిర్వహించిందని తెలిపారు.
2018-22 మధ్య 701 దేశద్రోహం కేసులు
2018 నుంచి 2022 వరకు 701 దేశద్రోహం కేసులు, 5,023 చట్టవిరుద్ధ కార్యకలాపాల నిరోధక చట్టం(ఉపా) కేసులు నమోదయ్యాయని కేంద్ర మంత్రి నిత్యానంద రాయ్ లోక్సభకు వెల్లడించారు.