తానంటే ఈటల రాజేందర్ భయపడుతున్నారని, గుండెలు బాదుకుంటున్నారని మంత్రి హరీశ్రావు విమర్శించారు. ‘‘ఈటల రోజుకో కేంద్ర మంత్రిని హుజూరాబాద్కు తెప్పించి మాట్లాడిస్తున్నడు. కేరళ నుంచి మురళీధరన్ అనే మంత్రిని తెచ్చి ప్రచారం చేపించుకుంటుండు. నేనొస్తే మాత్రం తప్పట. గుండెలన్నీ బాదుకుంటున్నడు. తిడుతున్నడు. నన్ను చూసి భయపడుతున్నడు” అని దుయ్యబట్టారు. దళిత బంధు రాకుండా ఈటల అడ్డుపడుతున్నారని ఆయన ఆరోపించారు.
ఆదివారం కరీంనగర్ జిల్లా జమ్మికుంట పట్టణంలో ఏర్పాటు చేసిన రైతు సమన్వయ సమితి సభలో, హుజూరాబాద్ సెంట్రల్ ఫంక్షన్ హాల్లో నిర్వహించిన గ్రామ పంచాయతీ కార్మికుల సమ్మేళనంలో హరీశ్ మాట్లాడారు. రైతులను ఓట్లు అడిగే అర్హత టీఆర్ఎస్కు తప్ప మరే ఇతర పార్టీలకు లేదని చెప్పారు. ‘‘బీజేపీ తెచ్చినవి నల్ల చట్టాలంటూ గతంలో ఈటల రాజేందర్చెప్పారు. ఆ నల్ల చట్టాలకు వ్యతిరేకంగా పోరాడుదామని చెప్పిన ఆయన బీజేపీలో చేరి హుజూరాబాద్లో రైతులను ఎట్లా ఓట్లు అడుగుతరు? ఈటల రాజేందర్... ప్రతిసారి నన్ను తిట్టుడు బంజేయ్. నువ్వు బీజేపీలో జాయినైనవ్ కదా.. కేంద్రం తెచ్చిన రైతు చట్టాలను రద్దు చేయించే సత్తా నీకుంటే చేయించు” అని అన్నారు. కాంగ్రెస్ పాలనలో కరెంట్ కోతలు, ట్రాన్స్ఫార్మర్లు పేలుడు, ఎరువుల కొరత ఉండేదన్నారు. టీఆర్ఎస్ అన్ని వర్గాల కోసం పథకాలను ప్రవేశపెట్టిందని, బీజేపీ చేసిందేంటో చెప్పాలన్నారు. ‘‘యాసంగిలో దొడ్డు రకం వడ్లు వేయొద్దని, కొనబోమని కేంద్రం లెటర్ రాసింది. ఈటలకు ఓట్లు రావాలంటే నన్ను తిట్టుడు కాదు.. ఢిల్లీకి పోయి దొడ్డు వడ్లు కొనాలని ఒప్పించాలి. రైతు చట్టాలను వాపస్ తీసుకోవాలని ప్రధానిని ఒప్పించాలి” అని హరీశ్ అన్నారు.
హుజూరాబాద్లో ఇండ్లెందుకు కట్టలే?
హుజూరాబాద్ దళిత బంధు విజయం దేశానికి ఆదర్శం కావాలని, కుట్రలు పన్నుతున్న చీడపీడలను ఏరివేయాలని హరీశ్ అన్నారు. ప్రతి దళిత కుటుంబానికి రూ. 9 .90 లక్షలు పడుతున్నట్లు ఫోన్లో టంగు టంగు మంటూ మెసేజ్లు వస్తున్నాయని చెప్పారు. వైన్స్, కాంట్రాక్ట్, ఫర్టిలైజర్ ఇలా అనేక పనుల్లో దళితులకు రిజర్వేషన్ ఇచ్చేందుకు కేసీఆర్ కృషి చేస్తున్నారని తెలిపారు. ‘‘ఈటల మంత్రిగా ఉన్నన్నాళ్లూ హుజూరాబాద్లో ఒక్క డబుల్ బెడ్రూం ఇల్లు పూర్తి చేయలేదు. మిగతా మంత్రులంతా ఇండ్లు కట్టారు. మళ్లీ ఈటల గెలిస్తే ఇండ్లు కడుతడా” అని హరీశ్ ప్రశ్నించారు. గ్రామ పంచాయతీ కార్మికుల జీతాలను సీఎం కేసీఆర్ రూ. 8,500 కు పెంచారని గుర్తు చేశారు. కారోబార్ల పదోన్నతికి సాయం చేస్తానని హామీ ఇచ్చారు.
