హైదరాబాద్ నాంపల్లి ఎగ్జిబిషన్ గ్రౌండ్, పరిసరాలు కాషాయ రంగులో మెరిసిపోతున్నాయి. బీజేపీ వర్కింగ్ ప్రెసిడెంట్ గా జగత్ ప్రకాశ్ నడ్డా తొలిసారి హైదరాబాద్ కు రావడంతో.. హైదరాబాద్ లో భారీ బహిరంగ సభ ప్లాన్ చేశారు పార్టీ నాయకులు. సాయంత్రం 4 గంటలకు నాంపల్లిలో బీజేపీ బహిరంగ సభలో జేపీ నడ్డా పాల్గొనబోతున్నారు. నమో భారత్ – నవ తెలంగాణ నినాదంతో.. ఈ పబ్లిక్ మీటింగ్ ను నాంపల్లి పబ్లిక్ గార్డెన్ లో ఏర్పాటుచేశారు.
రాష్ట్ర టీడీపీ, ఇతర పార్టీల నుంచి నాయకులు పెద్దసంఖ్యలో బీజేపీలో చేరబోతున్నారు. ఈ కార్యక్రమంలో బీజేపీ రాష్ట్ర అధ్యక్షుడు డాక్టర్ కె. లక్ష్మణ్, కేంద్ర హోంశాఖ సహాయమంత్రి కిషన్ రెడ్డి, మాజీ ఎంపీ వివేక్ వెంకటస్వామి, ఎంపీలు బండి సంజయ్, ధర్మపురి అర్వింద్, సోయం బాపూరావు సహా రాష్ట్ర పార్టీ ముఖ్యనేతలు, కార్యకర్తలు హాజరు కానున్నారు.
