హైదరాబాద్, వెలుగు: ఎస్సీ వర్గీకరణ జోలికి వస్తే ఊరుకోబోమని మాల మహానాడు జాతీయ అధ్యక్షుడు చెన్నయ్య హెచ్చరించారు. శనివారం హైదరాబాద్లోని వారి సంఘం కార్యాలయంలో ఆయన మీడియాతో మాట్లాడారు. ఎస్సీ వర్గీకరణ చెల్లదని సుప్రీంకోర్టు తీర్పు ఇచ్చిందని, ఆ తీర్పును గౌరవించకుండా కేంద్ర ప్రభుత్వం ఒక వర్గానికి వత్తాసు పలుకుతున్నదని మండిపడ్డారు.
వర్గీకరణపై తమ వైఖరి మార్చుకోని పార్టీలకు వచ్చే ఎన్నికల్లో మాలలు ఓటు ద్వారా గుణపాఠం చెప్తారన్నారు. పార్లమెంట్లో ఎస్సీ వర్గీకరణ బిల్లు ప్రవేశ పెట్టకుండా అన్ని రాష్ట్రాల ఎంపీలను కలిసి వినతిపత్రాలు అందజేస్తామన్నారు. ఈ కార్యక్రమంలో రాష్ట్ర ప్రధాన కార్యదర్శి మన్నె శ్రీధర్రావు తదితరులు పాల్గొన్నారు.
