నాగర్కర్నూల్, వెలుగు : పాలమూరు రంగారెడ్డి ప్రాజెక్ట్ లోని మొదటి లిఫ్ట్ నార్లాపూర్పంప్హౌస్ లో మొదటి పంప్ వెట్ రన్ సక్సెస్ అయింది. మొదటి పంప్ద్వారా వచ్చిన నీరు మంగళవారం సాయంత్రం ఆరు గంటలకు నార్లాపూర్ రిజర్వాయర్లోకి చేరింది. పంప్ ను నడిపించేందుకు ఇంజినీరింగ్ ఆఫీసర్లు, కాంట్రాక్ట్ ఏజెన్సీ సిబ్బంది నాలుగు రోజులు శ్రమించారు.
2023 సెప్టెంబర్లో మోటార్ ను గంటపాటు నడిపించి నిలిపివేశారు. తాజాగా వెట్ రన్ నిర్వహించేందుకు ఏర్పాట్లు చేసిన ఆఫీసర్లు సోమవారం మోటార్ ను ఆన్ చేసేందుకు ప్రయత్నించారు. డ్రై రన్ లో 200 ఆర్పీఎం దాటిన పంప్ వెట్ రన్ కు వచ్చే సరికి ఆ స్థాయిని అందుకోలేదు.
విద్యుత్ సరఫరాలో సమస్యలు ఉన్నట్లు గుర్తించిన ఆఫీసర్లు మంగళవారం ఉదయం వాటిని సరిచేశారు. తర్వాత గంట పాటు మోటార్ ను నిడిపించడంతో నీరు నార్లాపూర్ రిజర్వాయర్లోకి చేరింది. నీరు వచ్చే దృశ్యాన్ని చూసేందుకు స్థానికులు పెద్దసంఖ్యలో చేరుకున్నారు.
వారానికో పంప్ ను స్టార్ట్ చేస్తాం : ఎత్తిపోతల పథకం సలహాదారు పెంటారెడ్డి
వారానికి ఒక మోటార్ చొప్పున మాడు వారాల్లో మిగిలిన మోటార్ల డ్రై రన్ స్టార్ట్ చేస్తామని ప్రభుత్వ ఎత్తిపోతల పథకాల సలహాదారు పెంటారెడ్డి, ఈఈలు రవీందర్, లోకిలాల్ చెప్పారు. ప్రధాన కాల్వల పెండింగ్పనులను సాధ్యమైనంత త్వరగా పూర్తి చేసి నార్లాపూర్, ఏదుల, వట్టెం, కర్వెన రిజర్వాయర్లను కృష్ణా జలాలతో నింపాలన్న సీఎం ఆదేశాల మేరకు పనులు వేగంగా పూర్తి చేస్తున్నట్లు తెలిపారు.నార్లాపూర్రిజర్వాయర్నుంచి ఏర్పాటు చేసిన లింక్ కెనాల్ ద్వారా నీటిని ఎల్లూరు రిజర్వాయర్కు తరలించి మిషన్భగీరథ అవసరాలకు ఇబ్బంది లేకుండా చూస్తామన్నారు.
