కాఫీ, టీ తాగడానికి కెఫెకి... స్పెషల్ ఫుడ్ తినాలనిపిస్తే ఏదైనా రెస్టారెంట్కి వెళ్తారు ఎవరైనా. కానీ కేరళలోని కొట్టాయం జిల్లాలో ఉన్న వైకోంలో ఈ డబుల్ డెక్కర్ బస్సు ఎక్కితే చాలు. నచ్చింది తినొచ్చు. ఇష్టమైన కాఫీ తాగొచ్చు. కేరళ టూరిజం డెవలప్మెంట్ కార్పొరేషన్, కేరళ ఆర్టీసీ సంస్థతో కలిసి ఈ మధ్య ‘ది ఫుడీ వీల్స్ ప్రాజెక్ట్’ని వైకోంలో మొదలు పెట్టింది. టూరిస్టుల్ని అట్రాక్ట్ చేయడంతో పాటు రోడ్డెక్కని పాత బస్సుల్ని మూలపడేయొద్దనే ఆలోచనతో ఈ ప్రాజెక్ట్ స్టార్ట్ చేశారు.
పాత బస్సుకి రంగులు వేసి
పాత డబుల్ డెక్కర్ బస్సుకి రంగులు వేశారు. బస్సు మీద చెఫ్, సీ ఫుడ్ బొమ్మలు వేశారు. ఇంటీరియర్ డిజైనర్ సాయంతో పాత బస్సుకి రెస్టారెంట్ లుక్ తెచ్చారు. బస్సులోపల టేబుళ్లు, కుర్చీలు వేశారు. కింది అంతస్తులో ఏసీ పెట్టించారు. రెండు అంతస్తుల్లో ఒకేసారి 50 మంది దాకా తినొచ్చు. ఇక్కడ కేరళ స్పెషల్ వంటకాలే కాకుండా ఫారెన్ టూరిస్టులు తినే ఫుడ్ కూడా సర్వ్ చేస్తారు. ఈ రెస్టారెంట్లో ఫ్రెండ్స్, ఫ్యామిలీతో కలిసి నచ్చిన ఫుడ్ తింటూ, వైకోం టౌన్ బ్యాక్వాటర్స్ అందాల్ని చూడొచ్చు కూడా. ఈ ప్రాజెక్ట్ సక్సెస్ అయితే ఇలాంటి మరిన్ని ‘ఫుడ్ ఆన్ వీల్ రెస్టారెంట్లు’ తెరవాలనే ఆలోచనలో ఉన్నారు టూరిజం అధికారులు.
