హైదరాబాద్, వెలుగు: అల్లాపూర్ భూపోరాటం నేపథ్యంలో సామాజిక కార్యకర్త విమలక్కతో పాటు మరికొందరిపై 2013లో నమోదైన కేసును ఎల్బీనగర్ ఎస్సీ, ఎస్టీ స్పెషల్ కోర్టు కొట్టేసింది. ఈ కేసులో సాక్ష్యాధారాలను పరిశీలించిన న్యాయస్థానం.. మోపబడిన ఆరోపణలు అక్రమమని తేల్చిచెబుతూ నిందితులందరినీ నిర్దోషులుగా ప్రకటిస్తూ తీర్పునిచ్చింది. ఈ తీర్పుపై బాధితులు, ప్రజాసంఘాల నేతలు హర్షం వ్యక్తం చేశారు. చివరకు న్యాయమే గెలిచిందని పేర్కొన్నారు. అల్లాపూర్ పరిధిలోని సర్వే నంబర్ 1 నుంచి 55 వరకు గల దాదాపు 195 ఎకరాల ఇనాం భూములను కాపాడేందుకు విమలక్క నేతృత్వంలో పెద్ద ఎత్తున పోరాటం జరిగింది. అయితే, ఈ భూపోరాటాన్ని అణచివేయడానికి అప్పట్లో పెద్ద కుట్ర జరిగిందని ప్రజాసంఘాల నేతలు ఆరోపించారు.
అప్పటి సనత్ నగర్ పోలీసులు భూకబ్జాదారులతో చేతులు కలిపి విమలక్క, యూసుఫ్ ఖాన్, మహ్మద్ వంటి వారిపై కావాలనే ఎస్సీ, ఎస్టీ అట్రాసిటీ కేసు పెట్టారని వారు మండిపడ్డారు. విమలక్క తన 50 ఏండ్ల సుదీర్ఘ విప్లవ, సామాజిక జీవితంలో ఎప్పుడూ దళిత, బహుజన పక్షపాతిగానే నిలిచారని, అలాంటి ఆమెపై అట్రాసిటీ కేసు పెట్టడం దుర్మార్గమని న్యాయస్థానం సైతం అభిప్రాయపడినట్టు నేతలు గుర్తుచేశారు. కోట్లాది రూపాయల విలువైన అల్లాపూర్ ఇనాం భూములను ప్రకాష్ దారక్ వంటి వ్యక్తులు తప్పుడు పత్రాలతో కబ్జా చేశారని బాధితులు ఆవేదన వ్యక్తం చేశారు. ఈ భూదందా కారణంగా ఎందరో నిరుపేద ముస్లిం కుటుంబాలు తమ ఆస్తులను అమ్ముకుని రోడ్డున పడ్డాయని వారు వాపోయారు.
