మరిన్ని ఫీచర్లతో గూగుల్ డాక్స్

మరిన్ని ఫీచర్లతో గూగుల్ డాక్స్

టెక్స్ట్​ డాక్యుమెంట్లను దాచుకోవడానికి, వాటిని అవసరమైనప్పుడు ఎడిట్​ చేయడానికి చాలామంది గూగుల్ డాక్స్​ వాడతారు. ఈ అప్లికేషన్​ యూజర్లకు మరింత ఉపయోగపడేలా చేసేందుకు ఈ మధ్యే కొన్ని ఫీచర్లు యాడ్ చేసింది గూగుల్.  గూగుల్ డాక్స్​ నుంచి ఇ–మెయిల్స్ పంపడమే కాకుండా  లింక్స్ కూడా సెర్చ్​ చేయొచ్చు. అలాగే గూగుల్ నుంచి నేరుగా  ఫొటోల్ని ఇందులో  ఇన్​సర్ట్ చేయొచ్చు. అంతేకాదు వాయిస్ టైపింగ్, స్పెషల్ క్యారెక్టర్స్ యాడ్ చేయడం ఈజీ.  

ఇకపై గూగుల్ డాక్స్ నుంచి డ్రాఫ్ట్స్, ఇ–మెయిల్స్ పంపొచ్చు. ఇన్​​సర్ట్​ ఆప్షన్​లోకి వెళ్లి,  ‘బిల్డింగ్ బ్లాక్స్’ ఆప్షన్​ మీద క్లిక్​ చేస్తే ‘ఇ–మెయిల్​ డ్రాఫ్ట్​’ కనిపిస్తుంది. అది అచ్చం జి–మెయిల్ కంపోజ్​ చేసే విండో లాగ ఉంటుంది. ఇందులో టైప్​ చేసే టెక్స్ట్​ అటాచ్​మెంట్​లా కాకుండా ఇ–మెయిల్​లో ఉన్నట్టే బాడీ టెక్స్ట్​లా కనిపిస్తుంది. 

లింక్స్​ సెర్చ్  

టెక్స్ట్​లో ముఖ్యమైన పదాల్ని, వెబ్​సైట్ల పేర్లను హైలైట్ చేసేందుకు వాటిని హైపర్​లింక్స్​గా మార్చేస్తారు చాలామంది. అందుకోసం ఆ పదాన్ని కాపీ చేసి హైపర్​లింక్ బాక్స్​లో పేస్ట్ చేయాలి. ఆ పద్ధతిలో ఎక్కువ లింక్స్ క్రియేట్ చేసేందుకు  చాలా టైమ్ పడుతుంది. ఇప్పుడు గూగుల్ డాక్స్ ద్వారా ఆ పని తొందరగా అయిపోతుంది. హైలైట్ చేయాలనుకున్న పదాల మీద క్లిక్ చేయగానే యుఆర్​ఎల్​ (యూనిఫార్మ్ రిసోర్స్​ లొకేటర్​)ని చూపిస్తుంది గూగుల్ డాక్స్. ​ 

ఫొటోలు డైరెక్ట్​గా

గూగుల్ నుంచి ఫొటోలు డౌన్​లోడ్ చేసి, వాటిని గూగుల్ డాక్స్​లో పోస్ట్​ చేస్తుంటారు చాలామంది. అలాకాకుండా నేరుగా  గూగుల్​లో నుంచి ఫొటోల్ని గూగుల్​ డాక్స్​లో పోస్ట్ చేయొచ్చు. అందుకోసం... గూగుల్​ డాక్స్​లో ఇన్​సర్ట్​ ఇమేజ్​లోకి వెళ్లాలి. ఇమేజ్​ సెక్షన్ కింద ఉన్న ‘సెర్చ్​ ది వెబ్’ ఆప్షన్​ మీద క్లిక్ చేసి గూగుల్​లో అనుకున్న ఫొటోలన్ని సెర్చ్​ చేయాలి. అంతే  గూగుల్​ డాక్స్​లోకి ఫొటోలు వచ్చేస్తాయి.  

వాయిస్ టైపింగ్ ఫీచర్​

మాటల్ని, అక్షరాలుగా మార్చే ఫీచర్ గూగుల్​ డాక్స్​లో ఉంది. Control + Shift+ S shortcut ని వాడితే వాయిస్​ టైపింగ్ ఫీచర్ పనిచేస్తుంది. ప్రస్తుతానికి ఈ ఫీచర్​ గూగుల్​ క్రోమ్ యూజర్లకు మాత్రమే అందుబాటులో ఉంది. 

నచ్చిన ఫార్మాట్​... 

గూగుల్​ డాక్స్​లో ఫైల్స్​ డీఫాల్ట్​గా డాక్స్​ ఫార్మాట్​లో స్టోర్​ అవుతాయి. వాటిని  డాక్స్​ ఫార్మాట్​లోనే డౌన్​లోడ్​ చేసుకోవాల్సి వచ్చేది. ఇకపై ఆ ఫైల్స్​ని పిడిఎఫ్, టెక్స్ట్​ ఫార్మాట్​లో కూడా డౌన్​లోడ్​ చేసుకోవచ్చు. ఫైల్ మెనులో డౌన్​లోడ్ ఆప్షన్​ ఉంటుంది. అందులో అవసరమైన ఫార్మాట్​ని సెలక్ట్​ చేసుకోవాలి.

మల్టీమీడియా ట్వీట్

ట్విట్టర్  త్వరలోనే  ‘మల్టీమీడియా ట్వీట్’ అనే కొత్త ఫీచర్​ తీసుకురాబోతోంది. టెస్టింగ్ దశలో ఉన్న ఈ ఫీచర్​ అందుబాటులోకి వస్తే...  పోస్ట్​​తో పాటు ఫొటో, వీడియో, జిఎఫ్​ ఫైల్స్​ని కూడా పంపొచ్చు. అంతేకాదు మల్టీమీడియా ట్వీట్​కి ఎవరినైనా ట్యాగ్ చేయొచ్చు చూడా. ఇదేకాకుండా యూజర్లు ఒక నెలలో ఎన్ని ట్వీట్స్ చేశారు అనేది తెలుసుకునేందుకు మరో ఫీచర్​ కూడా తీసుకొచ్చే ప్రయత్నాల్లో ఉంది ట్విట్టర్​. 

వాట్సాప్​తో క్యాబ్ బుకింగ్

ఓలా, ఉబెర్​, ర్యాపిడో.... వీటిలో క్యాబ్​ బుక్​ చేయాలంటే యాప్​ కచ్చితంగా ఉండాలి. మరి యాప్​ లేనివాళ్ల పరిస్థితి ఏంటి?. అలాంటివాళ్లకు  వాట్సాప్​ ఉంటే చాలు. వాట్సాప్​తో క్యాబ్ బుక్​ చేసుకునే ఫీచర్​ తెచ్చింది ఉబెర్​ సంస్థ. అందుకోసం వాట్సాప్ నుంచి  7292000002 నెంబర్​కి మెసేజ్ పెట్టాలి. వెంటనే చాట్​బాక్స్ ఓపెన్​ అవుతుంది. అందులో పికప్, డ్రాప్ లొకేషన్​ పోస్ట్ చేయాలి. కొంచెం సేపటికి రైడ్​కి అయ్యే ఛార్జ్​, డ్రైవర్​ ఎవరు వస్తున్నారు, క్యాబ్​ రావడానికి ఎంత టైం పడుతుంది అనే వివరాలు వస్తాయి. ఆ మెసేజ్​ని క్యాబ్ డ్రైవర్​కి చూపించాలి. ఇప్పటివరకైతే ఈ ఫీచర్​ ఢిల్లీలో మాత్రమే అందుబాటులో ఉంది.

స్పోటిఫైలో ఫ్రెండ్స్​ మిక్స్ ఫీచర్​

కొత్త పాటలు, ఫ్రెండ్స్ ఎక్కువగా వినే పాటల్ని వాళ్లతో కలిసి ఒక ప్లే లిస్ట్​గా చేయొచ్చు. వాటిని షేర్ చేయొచ్చు కూడా.  ఫ్రెండ్​షిప్​ డే గిఫ్ట్​గా ‘ఫ్రెండ్స్​ మిక్స్’​ అనే ఫీచర్​ తీసుకొచ్చింది స్పోటి ఫై  ​ యాప్.  దీనివల్ల యూజర్లు ఒకేసారి మూడు బ్లెండ్ ప్లే లిస్ట్​లు  చేసుకోవచ్చు. ఒకేసారి పదిమంది ఫ్రెండ్స్​తో మిడ్​లే క్రియేట్ చేయొచ్చు. ఈ కొత్త  ప్లే లిస్ట్​ ​ ‘మేడ్​ ఫర్ అజ్​’ ట్యాబ్ కింద ఆటోమెటిక్​గా కనిపిస్తుంది. ఐఒఎస్, ఆండ్రాయిడ్ ఫోన్లలో  పనిచేస్తుంది. ప్రీమియం సబ్​స్క్రయిబర్స్​తో పాటు సబ్​స్క్రిప్షన్ తీసుకోనివాళ్లు కూడా ఈ ఫీచర్​ని ఉపయోగించుకోవచ్చు.