- వెలుగు కథనానికి అధికారుల స్పందన
జనగామ/ బచ్చన్నపేట, వెలుగు : జనగామ జిల్లాలోని 12 మండలాల్లో మండలానికి ఒకటి చొప్పున వరి ధాన్యం కొనుగోలు కేంద్రాలను శనివారం ప్రారంభించినట్లు జిల్లా సివిల్ సప్లై ఆఫీసర్ రోజారాణి తెలిపారు. ‘వెలుగు’ దినపత్రికలో ‘కొనుగోలు లేట్’ అని యాసంగి ధాన్యం కొనుగోళ్ల పై శనివారం కథనం ప్రచురితమైంది. దీనిపై అధికారులు శనివారమే స్పందించి సెంటర్లు ప్రారంభించారు. జిల్లాలో మొత్తం 190 సెంటర్లు ఏర్పాటు చేస్తున్నామని
ప్రస్తుతం మండలానికి ఒకటి స్టార్ట్ చేశామని అన్నారు. బచ్చన్నపేటలో కలెక్టర్ రిజ్వాన్ బాషా షేక్ చేతుల మీదుగా సెంటర్ ప్రారంభం కాగా మిగతా మండలాల్లో అధికారులు ప్రారంభించారని చెప్పారు. రైతులకు ఏవైనా ఇబ్బందులు కలిగితే టోల్ ఫ్రీ నంబర్ 6303928718 కు ఫోన్ చేయాలని కోరారు. అధికారులు వెంటనే స్పందించి సమస్యలు పరిష్కరిస్తామని భరోసా ఇచ్చారు.
కలెక్టరేట్ సమీక్ష : యాసంగి వరిధాన్యం కొనుగోళ్లలో సమస్యలు రాకుండా చర్యలు చేపట్టాలని కలెక్టర్ రిజ్వాన్ బాషా అధికారులను ఆదేశించారు. శనివారం కలెక్టరేట్ లోని కాన్ఫరెన్స్ హాల్లో అడిషనల్ కలెక్టర్ రోహిత్ సింగ్ తో కలిసి ధాన్యం కొనుగోలు కేంద్రాల నిర్వాహకులకు శిక్షణా కార్యక్రమం చేపట్టారు. సెంటర్ ల వద్ద రైతులకు ఇబ్బందులు కలుగకుండా ఉండేందుకు టోకెన్లు ఇవ్వాలని ఆదేశించారు.
అంతకుముందు సెంటర్ నిర్వాహకులు, ఏఈఓలకు పవర్ పాయింట్ ప్రజెంటేషన్ ద్వారా శిక్షణ ఇచ్చారు. కార్యక్రమంలో డీఎస్ఓ రోజారాణి, డీఏఓ వినోద్ కుమార్, డీసీఓ రాజేందర్ రెడ్డి, డీటీసీఎస్లు శ్రీనివాస్, దేవా పాల్గొన్నారు.
