ఇటీవల గురుగ్రామ్‌లో హింసాత్మక సంఘటనలు చోటుచేసుకున్న విషయం తెలిసిందే. మిలీనియం సిటీలో 3 చిన్న చిన్న సంఘటనలు, దుకాణాల వద్ద దహనం, విధ్వంసం మినహా ప్రశాంతంగా ఉందని హర్యానా పోలీసులు ఆగస్టు 2న తెలిపారు. గురుగ్రామ్‌లో ఇప్పటివరకు మొత్తం 18 కేసులు నమోదయ్యాయని, 50 మందికి పైగా నిందితులను అరెస్టు చేసినట్లు పోలీసులు తెలిపారు.
శాంతిభద్రతల పరిరక్షణ కోసం నగరంలోని సున్నితమైన ప్రదేశాలను గుర్తించిన పోలీసులు.. బలగాలను మోహరించారు. గురుగ్రామ్ పోలీసులు వివిధ ప్రదేశాలలో ఫ్లాగ్ మార్చ్‌లు నిర్వహించారు. శాంతిని కాపాడటానికి, పరిపాలనకు సహకరించడానికి శాంతి కమిటీ సభ్యులతో సమావేశాలు నిర్వహించారు. హింసకు సంబంధించిన ఎలాంటి అసభ్యకరమైన వీడియోలు, ఫొటోలు, రికార్డ్ చేసిన సందేశాలు, పుకార్లు లేదా మతపరమైన విఘాతం కలిగించే ఇతర మార్గాల్లో హింసకు సంబంధించిన ఎలాంటి తప్పుడు వ్యాఖ్యలను పోస్ట్ చేయవద్దని పోలీసులు ఇప్పటికే ప్రజలకు విజ్ఞప్తి చేశారు.
గురుగ్రామ్ నుండి బయలుదేరిన కార్మికులు
వేలాది మంది కార్మికులకు పని కల్పించే వాణిజ్య నగరంలో జరిగిన హింస.. రోజువారీ వేతనం అందుకునే, తక్కువ-ఆదాయం పొందే వారిని తీవ్ర భయాందోళనలను గురిచేసింది. దీంతో ఇప్పుడు వారు గురుగ్రామ్‌ను విడిచిపెట్టడం మొదలుపెట్టారు. హింసకు భయపడిన ఆటో రిక్షా డ్రైవర్ రెహ్మత్ అలీ పశ్చిమ బెంగాల్‌కు తిరిగి వెళ్లాలని ఆలోచిస్తున్నాడు. “మంగళవారం రాత్రి కొందరు వ్యక్తులు మోటారు సైకిళ్లపై వచ్చి, మమ్మల్ని వెళ్లకపోతే, మా మురికివాడకు నిప్పు పెడతారని బెదిరించారు. పోలీసులు రాత్రి నుండి ఇక్కడ ఉన్నారు, కానీ నా కుటుంబం భయపడి, మేము నగరం నుండి బయలుదేరుతున్నాము”అని సెక్టార్ 70A లోని మురికివాడలో నివసిస్తున్న అలీ అన్నారు. "పరిస్థితి మెరుగుపడినప్పుడు మేము తిరిగి వస్తాం" అన్నారాయన.
గురుగ్రామ్‌లో మత హింస తర్వాత, కొంతమంది ముస్లిం వలసదారులు కనీసం కొంతకాలం నగరాన్ని విడిచిపెట్టాలని ఆలోచిస్తున్నారు. అందులో భాగంగా నుహ్‌లోనూ కొంతమంది హిందూ వలసదారులు నగరాన్ని విడిచిపెట్టాలని నిర్ణయించుకున్నారు. ఇక జిల్లాలో కర్ఫ్యూ విధించడంతో పిల్లలతో సహా వలస కుటుంబాలు కాలినడకన అక్కడి నుంచి వెళ్లేందుకు సిద్ధమవుతున్నాయి. మధ్యప్రదేశ్‌కు చెందిన జగదీష్ మాట్లాడుతూ.. తాను గత కొన్ని నెలలుగా నుహ్‌లో నివసిస్తున్నానని, ఇప్పుడు ఇక్కడ భయంగా ఉందని, తన స్వగ్రామానికి వెళ్లిపోతానని చెప్పాడు.
పోలీసులు తెలిపిన వివరాల ప్రకారం, వజీరాబాద్, ఘటా గ్రామం, సెక్టార్ 70ఎ, బాద్‌షాపూర్‌లోని మురికివాడల్లో నివసిస్తున్న ముస్లిం వర్గానికి చెందిన చాలా మంది ప్రజలు తమ స్వస్థలాలకు తిరిగి వస్తున్నారు. డ్రైవర్లుగా, తోటమాలిగా, వీధి వ్యాపారులుగా, సేవకులుగా, పనిమనిషిగా పని చేసే వలస కార్మికులు భయంతో తమ స్వస్థలాలకు తిరిగి వెళ్తున్నారని సీనియర్ పోలీసు అధికారి ఒకరు అంగీకరించారు.
