మెహిదీపట్నం, వెలుగు: తెలంగాణ ఉద్యమస్ఫూర్తితో కలిసి పని చేద్దామని మాజీ మంత్రి, ఎమ్మెల్యే హరీశ్రావు పిలుపునిచ్చారు. ఆదివారం మధ్యాహ్నం లంగర్ హౌస్ లోని ఓ హోటల్లో పాలిటెక్నిక్ లెక్చరర్స్ అసోసియేషన్ ఆధ్వర్యంలో ఏర్పాటు చేసిన కార్యక్రమంలో క్యాలెండర్ ను ఆవిష్కరించారు. హరీశ్ రావు మంత్రిగా ఉన్నప్పుడు 6 వేల మంది కాంట్రాక్టు లెక్చరర్లను పలు దశల్లో రెగ్యులరైజ్ చేయగా.. వారు కృతజ్ఞత సభ ఏర్పాటు చేసి ఆయనను సన్మానించారు.
అనంతరం హరీశ్ రావు మాట్లాడుతూ.. తాను మంత్రిగా ఉన్నప్పుడు కాంట్రాక్టర్లు లెక్చరర్ల జీతం తక్కువగా ఉండేదని, ప్రత్యేక కృషితో శాలరీ పెంచేలా చర్యలు తీసుకున్నట్లు గుర్తుచేశారు. యూనియన్ పీఎస్ ఉమాశంకర్, ప్రధాన కార్యదర్శి అస్మతుల్లా ఖాన్, ప్రెసిడెంట్ అరుణ్ ఇమ్మానుయేల్ తదితరులు పాల్గొన్నారు.
